* “Serie A-da” myhmançylykda “Fiorentinany” 2–1 hasabynda utan “Ýuwentus” topary “Romanyň” 2-nji hatardaky “Napoliden” üstün çykmagyndan soň (1–0; Nainggolan 89), möwsümiň tamamlanmagyna 3 tapgyr galanda, özüniň nobatdaky çempionlygyna mynasyp boldy. Bassyr 5-nji, umumylykda 32-nji ýola “Serie A-nyň” çempiony bolan “Ýuwentus” 2-nji sapar yzly-yzyna 5 çempionlyk gazandy. Turinliler ozalam 1931–32–33–34–35-nji ýyllarda bassyr 5 gezek ýeňiji bolupdy. Olar muny 2-nji gezek başaran ilkinji topar bolup, “Torino” (1945–46–47–48–49) bilen “Inter” (2006–07–08–09–10) hem yzly-yzyna 5 çempionlyk kubogyny asmana göteripdi. Şunlukda, “Ýuwentus” ezeli bäsdeşleri 18 çempionlyklary bar bolan “Milandyr” “Inter” toparlary bilen arasyndaky çempionlyk aratapawudyny 14-e çykardy.
* Italiýanyň çempionatynda ligada galmak üçin tagalla baryny eden “Hellas Werona” topary “Milany” 2–1 hasabynda utdy. Ýöne şol oýnuň yzysüre oýnalan duşuşykda “Karpiniň” “Empolini” 1–0 hasabynda utmagyndan soň, weronalylar aşaky liga, ýagny “Serie B-e” düşmeli boldy.
* “La Ligada” çempionlyk ugrunda ýiti göreş alyp barýan toparlar 35-nji tapgyry ýeňiş bilen tamamlamagy başardy. Lider “Barselona” öz meýdançasynda “Sporting Gihony” 6–0 hasabynda utup, yzly-yzyna gelen ýeňlişleriň ahmyryny çykarmagyny bu tapgyrda-da dowam etdi. Duşuşykda Luis Suares bu sapar hem 4 gol geçirdi (2-si penaltiden). Ol geçenki tapgyrda-da “Deportiwonyň” toruny 4 gezek sarsdyrypdy.
* Madrid derbisinde “Raýo Wallekano” bilen “Real Madrid” duşuşdy. Ilkinji 14 minutda 2 gol geçirip, öňe saýlanan ýer eýeleri güýçli garşydaşynyň oýnuna güýç ýetirip bilmedi. Netijede, Beýl 2, Lukas 1 gol geçirip, “Reala” 3 utuk getirdi we çempionlyk ýaryşyny säwliksiz dowam etdirdi.
* Iň az gol geçirtmekde rekorda tarap barýan “Atletiko Madrid” hem öz meýdançasynda “Malagany” Korreanyň ýeke-täk goly bilen ýeňlişe sezewar edip, çempionlyk ýaryşynyň dartgynynyň hasam artjakdygyny görkezdi.
* “Sewilýa” derbisinde “Sewilýa” topary şäheriň beýleki kluby “Betisi” 2–0 hasabynda ýeňlişe sezewar etdi.
* Türkiýäniň 2-nji ligasynda möwsümiň tamamlanmagyna 3 tapgyr galanda, çempionlygyny yglan eden “Adanaspor” 12 ýyldan soň, ýokary liga – “Süper Lige” çykmagy başardy.
Nobatdaky tapgyryň esasy oýunlary: “M. Ýunaýted”–“Lester”, “Çelsi”–“Tottenham”, “R. Sosiedad”–“R. Madrid”, “Atletiko”–“Raýo”, “Betis”–“Barselona”, “Bawariýa”–“Borussia M.”, “Baýer”–“Herta”, “Porto”–“Sporting”, “Şahtýor D.”–“Dinamo K.”, “Lasio”–“Inter”, “Mordowiýa”–“Rostow”, “Lokomotiw”–“Spartak”, SSKA–“Zenit” (Kubogyň finaly, 2-nji maý).
