* Angliýanyň çempionatynda sanawyň lideri “Lester Siti” öz meýdançasynda “Swansi” toparyny 4–0 hasabynda utdy. Ýer eýeleriniň gollaryny Mahrez, Ulloa (2) we Olbraýton derwezä girizdi. Şol sanda “Tottenham” öz meýdançasynda “West Bromwiç” bilen 1–1 hasabynda deňme-deň oýnap, zerur bolan 2 utugy ýitirdi. Duşuşykda 2 goly-da “West Bromwiç” toparynyň goragçysy Kreýg Dawson öz adyna ýazdyrdy. Bu netijelerden soň, aratapawudy 7 utuga çykaran “Lester Siti” çempionlyga ýene-de 1 ädim golaýlady. Ranieriniň şägirtleri galan 3 oýnuň birinde ýeňiş gazanan ýagdaýynda-da ilkinji gezek “Premier liganyň” çempiony bolar. “Lesteriň” galan oýunlary: “M. Ýunaýted” (m), “Ewerton” (ö), “Çelsi” (m). “Tottenhamyň” galan oýunlary: “Çelsi” (m), “Southempton” (ö), “Nýukasl” (m).
* Germaniýanyň “Bundesligasynda” möwsümiň tamamlanmagyna 3 tapgyr galanda, soňky çempion “Bawariýa” Dortmundyň “Borussiasy” bilen arasyndaky 7 utuklyk aratapawudy saklamagy başardy. Olar nobatdaky tapgyrda ýeňiş gazanan ýagdaýynda çempionlygyny yglan eder.
* “Bundesligada” “Ingolştadt” bilen 2–2 hasabynda deňme-deň oýnan “Hannower” ýokary liga bilen hoşlaşdy.
* Russiýanyň çempionatynda sanawyň lideri, ildeşimiz Gurban Berdiýewiň tälim berýän “Rostowy” ornuny saklaýar. Olar soňky tapgyrda liganyň güýçli klublaryndan “Zeniti” 3–0 hasabynda ýeňlişe sezewar etdi. Ýer eýelerine ynamly ýeňiş gazandyran gollary Kanga, Serdar Azmun hem-de Ýerohin derwezä girizdi.
* “Rostowyň” söbügini basyp barýan SSKA topary “Dinamony” A. Berezuskiniň goly bilen utdy.
* Russiýanyň ýokary ligasynda 2 oýun ir oýnalyp, çempionlygy gyzyklandyrýan bu duşuşyklarda SSKA “Uraly 3–0, “Zenit” “Kubany” 4–1 hasabynda ýeňdi.
