Angliýanyň Liga kubogynyň (“EFL Cup”) ýarym finalynyň birinji duşuşyklary geçirildi. London derbisinde – “Çelsi” bilen “Arsenalyň” arasyndaky duşuşykdan gol sesi çykmady. “Mançester Siti” öz meýdançasynda 2-nji liganyň wekili, çärýek finalda “Mançester Ýunaýtedden” üstün çykan “Bristol Sitini” 2–1 hasabynda ýeňlişe sezewar etdi. 44-nji minutda Reid bilen öňe saýlanan myhmanlaryň torundan ýeňiş pökgülerini 55-nji minutda De Bruýne bilen 90+2-nji minutda Aguero geçirdi. Jogap duşuşyklary 23–24-nji ýanwarda oýnalar.
* * *
Ispaniýanyň Şa kubogy bäsleşiginde (“Copa del Rey”) çärýek finalçylar belli boldy. 1-nji duşuşykda “Numansiýany” 3–0 hasabynda ýeňen “Real Madrid” öz meýdançasyndaky jogap oýnunda deňme-deň oýnady. Myhmançylykda 1–0 hasabynda “Leganesden” asgyn gelen “Wilýarreal” öz meýdançasynda 2–1 ýeňiş gazansa-da, çärýek finalda çykyş etmäge ygtyýar alyp bilmedi. Myhmançylykda “Selta” bilen 1–1 oýnan “Barselona” öz meýdançasynda garşydaşyny 5–0 hasabynda ýeňip, çärýek finala ýollanma aldy.
“Atletiko”–“Leýda Esportiu”: 3–0 (4–0), “Walensiýa”–“Las Palmas”: 4–0 (1–1), “Alawes”–“Formentara”: 2–0 (3–1), “Wilýarreal”–“Leganes”: 2–1 (0–1), “Real Madrid”–“Numansiýa”: 2–2 (3–0), “Sewilýa”–“Kadiz”: 2–1 (2–0), “Lewante”–“Espanýol”: 0–2 (2–1), “Barselona”–“Selta”: 5–0 (1–1).
* * *
Angliýanyň FA kubogy ýaryşynda Londonyň “Arsenaly” 3-nji tapgyrda utuldy. “Topçular” myhmançylykda birwagtlaryň güýçli topary, häzirki wagtda 2-nji ligada çykyş edýän “Nottingem Forestden” 4–2 hasabynda asgyn geldi. Şeýlelikde, bu kubogy iň köp gazanan topar bolan “Arsenal” 1996-njy ýyldan soň, ilkinji gezek FA kubogynyň 3-nji tapgyrynda ýaryşdan çykdy. Şeýle-de “Mançester Siti”, “Liwerpul”, “M. Ýunaýted”, “Tottenhem” ýaryşy dowam etdirse, “Çelsi” bilen “Lester Siti” 3-nji tapgyrda öz garşydaşlary bilen deňme-deň oýnady. Olar bu duşuşyklaryny gaýtadan geçirerler.
