Şu ýylyň 1-3-nji marty aralygynda däbe öwrülen Eýran Yslam Respublikasynyň XIV ýöriteleşdirilen sergisi geçirilýär. Şeýle hem goňşy ýurduň ykdysady gözden geçiriliş çäresi bilen bir hatarda türkmen-eýran işewürler forumy hem guraldy. Oňa gatnaşmak üçin EYR-nyň senagat, magdanlar we söwda ministri Mohammad Şariatmadariniň baştutanlygynda ýolbaşçylardan ybarat wekilçilikli topar geldi.
Türkmen paýtagtyna gelen myhman hormatly Prezidentimiz tarapyndan hem kabul edildi. Duşuşykda söwda-ykdysady ulgamda türkmen-eýran hyzmatdaşlygynyň geljegi barada pikir alşyldy. Aşgabatdaky söwda-senagat edarasynyň binasynda her ýyl geçirilýän eýranly haryt öndürijileriniň gazananlarynyň sergisine 60-dan gowrak eýran kompaniýalary gatnaşyp, öz önümlerini görkezdiler.
Serginiň açylyş dabarasynda oňa gatnaşyjylara hormatly Prezidentimiziň iberen Gutlagy okaldy. Onda “Türkmenistan – Beýik Ýüpek ýolunyň ýüregi” diýlip atlandyrylan ýylda geçirilýän bu çäreleriň köptaraply türkmen-eýran gatnaşyklarynyň giňeldilmegine kuwwatly itergi berjekdigine ynam bildirilýändigi nygtalýar.
EYR-nyň senagat, magdanlar we söwda ministri Mohammad Şariatmadari sergä gatnaşyjylara hem-de myhmanlara gutlag sözleri bilen ýüzlenip, şu gezekki iri möçberli serginiň özara bähbitli ikitaraplaýyn hyzmatdaşlygyň ösdürilmegine, söwda-ykdysady ulgamda bilelikdäki taslamalaryň üstünlikli amala aşyrylmagyna ýardam berjekdigini belledi.
Sergide gurluşyk senagatynda, ýyladyş we sowadyş ulgamlary üçin senagat enjamlaryny çykarýan önümçilikde, guşçulykda hem-de maldarçylyk toplumlarynda, azyk pudagy we ýyladyşhana hojalyklary üçin enjamlary öndürýän iri kärhanalaryň önümleri görkezildi.
Sergä yzygiderli gatnaşýanlaryň hatarynda “Iran Khodro” milli awtomobil gurluşygy konsorsiumynyň wekili bar. Bu sergide 2018-nji ýyla degişli “Peugeot”, “Renault”, “Dena+”, “Arisan” kysymly ýeňil awtomobilleriň birnäçe nusgalary görkezildi. Olaryň ählisi häzirki zaman ýewrostandartlarynyň, energiýa tygşytlamak we daşky gurşawy goramagyň talaplaryna laýyklykda kämilleşdirilipdir.
EYR-nyň ilçihanasynyň ýanyndaky medeni merkez, “Saderat-Eýran” bankynyň Türkmenistandaky wekilhanasy hem sergide öz bölümlerini guradylar.
2-nji martda türkmen-eýran işewürler maslahaty geçirildi, onuň dowamynda iki ýurduň işewür toparlarynyň wekilleri geljekde söwda-ykdysady hyzmatdaşlygynyň meselelerini, milli ösüş meýilnamalaryny hem-de sebit hyzmatdaşlygyny nazara almak bilen has amatly ugurlary ara alyp maslahatlaşdylar.