Çilim çekmegiň adam saglygyna zyýanlydygy belli zat. Bu babatda alymlar dürli ylmy-barlag işlerini yzygiderli geçirýärler. Golaýda Ýaponiýanyň alymlar topary tarapyndan köp mukdarda çilim çekilen halatynda onuň eşidiş synalaryna oňaýsyz täsirini ýetirýändigi mälim edildi. Bu barada “Asahi” gazeti habar berýär. Ýaponiýanyň Bütindünýä saglygy goraýyş we lukmançylyk milli merkeziniň alymlar topary ýurduň paýtagtyndaky iri korporasiýanyň 20 bilen 64 ýaş aralygyndaky işgärleriniň 50 müňüsiniň gatnaşmagynda barlag işlerini geçirdi. Olar 2008-2010-njy ýyllar aralygyndaky lukmançylyk barlaglarynyň netijelerini alymlar toparyna tabşyrdylar. Çilim çekip-çekmeýändikleri barada maglumat berdiler. Olar barlag döwründe yzygiderli lukmanlaryň gözegçiliginde boldular.
Şol döwürde 5 müňden gowrak adamyň eşidiş agzalarynyň belli bir möçberde peselendigi mälim edildi. Netijelere görä, her gün 10-a çenli çekilen çilimiň ker bolmak ähtimallygyny 1,4 esse artdyrýandygy, eger çilimiň mukdary 1 guta çenli artdyrylan halatynda, bu görkezijiniň 1,7 essä çenli ýokarlanýandygy anyklanyldy. Ýapon alymlarynyň bellemegine görä, zyýanly nikotin we çilim çekeniňde, gan aýlanyşygyň bozulmagy gulagyň içki bölegine ýaramaz täsir edýär. Şeýle ýagdaýa soňky ýyllarda has meşhurlyk gazanyp başlan elektron çilimlerde köp duş gelinýär.
Sylapberdi Mämmedow,
Halkara nebit we gaz uniwersitetiniň talyby.