AFK Kubogynda “D” toparçada çykyş edýän ýurdumyzyň çempiony “Altyn asyr” topary Balkanabatda Gyrgyz Respublikasynyň wekili “Alaý Oş” topary bilen duşuşdy. Ýakub Al-Hammadiniň jürlewük çalan oýnuna 1253 janköýer tomaşa etdi. Turuwbaşdan ildeşlerimiz hüjüm oýnuny saýlap aldy we bu eýýäm ilkinji minutlardan öz oňyn netijesini berip başlady. Duşuşygyň 8-nji minutynda Mekan Aşyrow topy derwezä golaý aralykdan sag aýagy bilen batly depip, hasaby açdy. 25-nji minutda Serdar Annaorazowyň pasyndan soň, Altymyrat Annadurdyýew hasaby 2-ä çykardy.
Oýnuň birinji ýarymy 2–0 hasabynda aragatnaşykçylaryň peýdasyna tamamlandy. Ikinji ýarymda-da doly artykmaçlyk türkmen toparynyň tarapynda boldy. Aragatnaşykçylaryň ezber hüjümçisi Myrat Ýagşyýew 2-nji ýarymyň ilkinji 20 minutynda 2 gol geçirdi. 60-njy minutda ýene-de Serdar Annaorazowyň pasyndan soň, Myrat Ýagşyýew jaýdar urgy bilen topy derwezä ýollady. Bu goldan 9 minut soň, myhmanlaryň oýunçylary jerime meýdançasynda Furkat Tursunowyň garşysyna gödeklige ýol berdi. Eminiň bellän penaltisini-de Myrat Ýagşyýew dürs ýerine ýetirip, hasaby 4-e çykardy. Duşuşygyň ahyrynda-da, has takygy, 90+1-nji minutda-da Altymyrat Annadurdyýew hem özüniň oýundaky 2-nji goluny geçirdi. Bu gezek goluň pasyny Myrat Ýagşyýew berdi. Şeýlelikde, duşuşykda “Altyn asyr” 5–0 hasabynda ýeňiş gazandy. Bu duşuşykdan soň, utugyny 11-e ýetiren “Altyn asyryň” indiki tapgyra çykmak mümkinçiligi dowam edýär. Türkmenistanyň çempiony soňky tapgyrda myhmançylykda “Istiklol” bilen duşuşar. 16-njy maýda oýnaljak bu oýunda “Altyn asyryň” ýaryşy dowam etdirmegi üçin ýeňiş gazanmagy zerurdyr. Toparçadaky beýleki duşuşykda myhmançylykda “Ahaldan” 1–0 hasabynda üstün çykan “Istiklol” toparynyň 13 utugy bar.
