UEFA Çempionlar ligasynda 2-nji saýlama tapgyryň oýunlary tamamlandy. Gazagystanyň “Astana” topary Daniýanyň çempiony “Midtýulland” bilen myhmançylykda 0–0 oýnap, ýaryşy dowam etdirmäge hukuk gazandy. Olar 1-nji oýunda 2–1 hasabynda ýeňipdi. Bolgariýanyň çempiony “Ludogoresiň” Wengriýanyň çempiony “MOL Wididen” asgyn gelmegi köpleri geň galdyrdy. Tapgyryň iň esasy duşuşygy “Seltik” bilen “Rosenborgyň” arasynda bolup, şotlandlar 2 oýnuň netijesi boýunça 3–1 ýeňiş gazandy. “Aýaks” topary Awstriýanyň “Şturm Gras” klubundan (2–0, 3–1), grekleriň PAOK topary-da güýçli garşydaşy “Bazelden” (2–1, 3–0) 2 oýnuň netijesi babatda 5–1 hasabynda üstün çykdy.
Ýewropa ligasynda “Sewilýa”, “Leipsig”, “Kopengagen”, “Beşiktaş”, “Stýaua”, “Reýnjers”, “Bordo”, “Atalanta” ýaly klublar 2-nji tapgyry ýeňillik bilen geçdi. “AZ Alkmaar”, “Sparta Praga” ýaly klublaram pes toparlardan asgyn gelip ýaryşdan çykdy.
Çempionlar ligasynda 3-nji saýlama tapgyryň 1-nji duşuşyklary 7–8-nji, jogap oýunlary-da 14-nji awgustda oýnalar. Ýewropa ligasynda-da 3-nji saýlama tapgyrynyň duşuşyklary 9-njy we 16-njy awgustda geçiriler.
3-nji saýlama tapgyrynyň duşuşyklary:
Çempion toparlar: “Seltik” (Şotlandiýa)–AEK (Gresiýa), “RB Salsburg” (Awstriýa)–“Şkendiýa” (Makedoniýa), “S. Zwezda” (Serbiýa)–“Spartak T.” (Slowakiýa), “Garabag” (Azerbaýjan)–BATE (Belarus), “Astana” (Gazagystan)–“Dinamo Z.” (Horwatiýa)”, “Malmö” (Şwesiýa)–“MOL Widi” (Wengriýa); Çempion däl toparlar: “Standard” (Belgiýa)–“Aýaks” (Gollandiýa), “Benfika” (Portugaliýa)–“Fenerbahçe” (Türkiýe), “Slawiýa” (Çehiýa)–“Dinamo K.” (Ukraina), PAOK (Gresiýa)–“Spartak M.” (Russiýa).
