Dünýä belli iňlis teleýaýlymy BBC tarapyndan 1992-nji ýyldan bäri gowşurylyp gelinýän Afrikada ýylyň futbolçysy baýragynyň bu ýylky dalaşgärleri belli boldy. Bu ýylky dalaşgärleriň 2-si Angliýanyň “Liwerpul” toparynyň ýyldyzlary bolup, olar müsürli Mohamed Salah bilen senegally Sadio Manedir. Şeýle-de 5 dalaşgärden ybarat bu sanawa Italiýanyň “A-Seriýasyndan” hem 2 futbolçy, has takygy, 2 goragçy alnypdyr. “Ýuwentusyň” marokkoly oýunçysy Medhi Benatia, beýlekisi-de “Napoliniň” senagally goragçysy Kalidu Kolibalidir. Arzyly baýraga dalaş edýän 5-nji oýunçy-da “Atletiko Madridiň” ganaly ýarymgoragçysy Tomas Partidir. Geçen ýyl Mohamed Salahyň alan bu baýragynyň täze eýesi 11-nji dekabrda geçiriljek dabarada mälim ediler. Ýeri gelende aýtsak, Afrikanyň Futbol konfederasiýasy tarapyndan hem her ýyl yklymyň iň ökde oýunçysy saýlanýar. Bu baýrak bolsa, 1970-nji ýyldan bäri her ýylyň mart aýynda gowşurylýar.
