2017-2018-nji futbol möwsümi boýunça Ýewropada iň girdejili futbol meýdançasy hökmünde “Kamp Nou” stadiony saýlandy. Ispaniýanyň “Barselona” toparynyň stadionynyň geçen möwsümdäki girdejisi 144,8 million ýewro barabar boldy. Bu ugurda ikinji orny ýene-de bir ispan toparynyň stadiony eýeledi. “Real Madrid” toparynyň “Santýago Bernabeu” stadiony geçen möwsümiň dowamynda topara 143,4 million ýewro girdeji getirdi. Angliýanyň “Mançester Ýunaýted” toparynyň futbol duşuşyklaryny geçirýän “Old Trafford” stadiony girdejililigi boýunça üçünji orny eýeläp, onuň görkezijisi 119,5 million ýewro deňdir.
Şeýle hem ilkinji onluga “Emirates” (“Arsenal” topary, Angliýa, 111,6 mln ýewro), “Alýans Arena” (“Bawariýa” topary, Germaniýa, 103,8 mln ýewro), “Park de Prens” (PSŽ topary, Fransiýa, 100,6 mln ýewro), “Enfild” (“Liwerpul” topary, Angliýa, 91 mln ýewro), “Uembli” (“Tottenham”topary, Angliýa, 85,2 mln ýewro), “Stemford Brij” (“Çelsi” topary, Angliýa, 83,4 mln ýewro) we “Etihad” (“Mançester Siti” topary, Angliýa, 63,9 mln ýewro) ýaly stadionlar girdi.
Sanawda ilkinji orunlary Ispaniýanyň toparlarynyň eýelemegi tötänden däldir. Sebäbi ispan futboly ýurduň ykdysadyýetinde möhüm ähmiýete eýedir. Ýurduň futbol ugry ykdysady mümkinçilikli pudaga öwrülip, jemi içerki önümiň 1,37 göterimine deň bolup, ykdysady möçberi 15 milliard 688 million dollara, bir möwsümdäki girdejisi 4 milliard ýewro deňdir.
“Price Waterhouse Coopers” kompaniýasy ýokary netijeli futbolyň ýurduň ykdysadyýetine, maliýe we durmuş ýagdaýyna täsiri barada hasabat taýýarlady. Şoňa laýyklykda, “La Liga” diýlip atlandyrylan ispan futbol çempionatynyň girdejisi soňky 4 ýylda 2 esse ýokarlandy.
Futbol bilen baglanyşyklylykda myhmanhana işewürligi, jemgyýetçilik iýmiti, ulag, metbugat, telewideniýe ýaly pudaklar hem ägirt uly girdeji gazanyp, bu pudaklara 1 milliard 72 million girdeji hem-de 16 müňden gowrak täze iş orunlaryny döretmäge mümkinçilik berdi.
Futbolyň metbugata goşandy hem uludyr. Hasabatlardan görnüşi ýaly, futbolyň metbugata getirýän girdejisi 55,5 million ýewro, telewideniýä 109 million ýewro, radio bolsa, 82 million ýewrodyr. Futbol köpçülikleýin habar beriş serişdelerine umumylykda 516 million ýewro girdeji gazandyryp, goşmaça 2900 iş ornuny döretmäge ýardam etdi.
Seýitmämmet SEÝITMÄMMEDOW,
Türkmen döwlet binagärlik-gurluşyk institutynyň talyby.
