Singapur dünýäniň iň gowy port şäheri hökmünde alty ýyl bäri yzly-yzyna ykrar edilip gelinýär. “Sinhua” habarlar gullugy we Baltika biržasy tarapyndan düzülen halkara gämi gatnawynyň ösüşiniň görkezijisiniň täzelenen reýtingi Singapuryň “The Straits Times” gazetinde neşir edildi. “Singapur gämi gatnawynyň dolandyrylyşy boýunça öz mümkinçiliklerini ynamly görkezýär, şeýle hem, brokerlik (dellalçylyk) hyzmatlarynyň ýokary derejesini saklap gelýär” diýlip, dünýäniň 42 port şäheri bellige alnan reýtingde mälim edilýär. Baltika biržasynyň Aziýa şahamçasynyň ýolbaşçysy Lu Su Lin halkara arenasynda Singapur portunyň strategik ähmiýetiniň uludygyny belledi. – Bu port ýurduň ykdysady ösüşinde ileri tutulýan orny eýeleýär. Şonuň üçin ýurduň hökümeti deňiz senagatyny ösdürmäge gönükdirilen maýa goýumlaryna aýratyn çemeleşmegi zerurdyr – diýip, ol aýtdy.
Her ýyl mälim edilýän reýtingiň ikinji ornuny Gonkong eýeläp, reýtingiň awtorlarynyň aýtmagyna görä, Pekiniň “Bir guşak – bir ýol” taslamasy hem-de “Uly aýlag” taslamasy arkaly bu sebitde uly ösüşler gazanylýar. Häzirki wagtda Gonkong, Makao we Guandun welaýatynyň dokuz şäheri girýän sebitde tehnologiýalaryň, innowasiýalaryň we ykdysady işjeňliginiň has ösen merkezi kemala gelýär. Bu taslama HHR-iň Başlygy Si Szinpiniň 11 şäheri halkara ähmiýetli möhüm innowasion merkeze öwürmek baradaky maksatlaryndan gözbaş alyp gaýdýar. Bilermenleriň baha bermegine görä, 2035-nji ýyla çenli “Uly aýlagyň” jemi içerki önümi iki esse artyp, 3,2-den 4,1 trillion dollara ýeter. 69 million ilatly, meýdany 56 müň inedördül metre deň bolan bu sebit HHR-iň iň ösen sebiti bolup, ýurduň milli girdejisiniň 12 göterimini düzýär.
Üçünji orny birinji derejeli broker we maliýe hyzmatlary üçin London eýeläp, onuň yz ýanyndan hem Şanhaý we Dubaý gelýär.
Halkara gämi gatnawynyň ösüşiniň görkezijisi uly şäherleriň port, maliýe we transport hyzmatlary göz öňünde tutulyp düzülýär.
Maral SAPAROWA,
Türkmenbaşy şäherindäki
Magtymguly adyndaky 2-nji orta mekdebiň mugallymy.
