Futbol boýunça Dünýä Kubogy – 2022 we Aziýa Kubogy – 2023 ýaryşlarynyň saýlama tapgyrynyň çäklerinde “H” toparçada çykyş edýän Türkmenistanyň milli ýygyndysy şu gün (14-nji noýabrda) Koreýa HDR-niň ýygyndysyny kabul eder. Paýtagtymyzdaky “Köpetdag” stadionynda oýnaljak bu duşuşyk 16:00-da başlar. Ildeşlerimiz ak köýnekçede, myhmanlar bolsa gyzyl köýnekçede çykyş ederler.
Oýunda tailandly emin Siwakorn Pu-Udom jürlewük çalar. Onuň ildeşleri Rawut Nakarit bilen Tanate Çuýen baş emine ýardam berer.
Bu duşuşyk Türkmenistanyň ýygyndysy bilen KHDR-iň ýygyndysynyň arasyndaky 7-nji oýun bolar. Mundan öňki 6 oýunda koreýler 4 gezek ýeňiş gazandy. 2 duşuşyk hem deňlikde tamamlandy.
Toparçadaky beýleki duşuşykda bolsa, Liwan bilen Koreýa Respublikasy özara güýç synanyşar.
Şeýle-de horwatiýaly Ante Mişeniň tälimçiligindäki Türkmenistanyň milli ýygyndysy 19-njy noýabrda, geljek hepdäniň sişenbe güni ýene bir duşuşyk geçirer. Şri Lankanyň ýygyndysy bilen boljak bu oýun “Köpetdag” stadionynda oýnalar we şol duşuşyk hem 16:00-da başlar.
