UEFA Çempionlar ligasynyň täze möwsüminiň saýlama oýunlary ýokary depginde dowam edýär. Şu hepdäniň dowamynda 2-nji saýlama tapgyrynyň jogap oýunlary oýnaldy. Şotlandiýanyň çempiony “Seltik” topary UEFA-nyň täze wekillerinden Gibraltaryň “Linkoln Red Impsden” 1-nji oýunda 1–0 hasabynda utulypdy. 2-nji duşuşykda 3–0 hasabynda ýeňşini baýram eden “Seltik” taryhy wakanyň bolmagyna mümkinçilik bermedi.
3-nji saýlama tapgyrda aýartynam, çempion däl toparlaryň arasynda dartgynly, çekeleşikli oýunlaryň bolmagyna garaşylýar. Russiýada geçen möwsümde çempionlyk ugrunda ýiti göreş alyp baran “Rostow” Belgiýanyň “Anderleht” kluby bilen duşuşar. Türkiýäniň wise-çempiony “Fenerbahçe” topary “Monako” bilen bije çekişdi. Şeýle-de “Aýaks”–PAOK, “Sparta”–“Stýaua”, “Şahtýor Donesk”–“Ýang Boýz” duşuşyklary oýnalar.
“Seltik” ýene-de
gazak topary bilen duşuşar
Çempion toparlara seredeniňde, geçen möwsümde taryhynda ilkinji gezek toparçalarda çykyş eden gazak topary “Astana” Şotlandiýanyň “Seltigi” bilen duşuşar. Ýeri gelende aýtsak, 2013/14 möwsüminiň pleý-off tapgyrynda “Seltik” Gazagystanyň başga bir wekili “Şahtýor Karaganda” bilen özara güýç synanyşypdy. Myhmançylykda 2–0 hasabynda utulan şotland kluby öz meýdançasynda soňky pursatlarda gol geçirip, garşydaşyny 3–0 hasabynda ýeňipdi we ýaryşy dowam etdiripdi.
3-nji saýlama tapgyryň 1-nji duşuşyklary 26–27-nji iýulda, jogap oýunlary-da 2–3-nji awgustda oýnalar. 5-nji awgustda-da Çempionlar ligasyna gatnaşýan soňky 10 kluby kesgitleýän pleý-off tapgyrynyň bijeleri çekiler. Pleý-off tapgyrynda çempion bolmadyk klublara “Mançester Siti”, “Porto”, “Roma”, “Willarreal”, “Borussia M.” ýaly biri-birinden güýçli 5 toparyň garaşýandygyny-da ýatladýarys.
Çempionlar ligasyna jemi 32 klub gatnaşyp, olaryň 22-si gönümel gatnaşsa, 10 topar 4 tapgyrly saýlama oýunlaryndan soň belli bolar. Çempionlar ligasynyň toparçalarynyň bije çekiliş dabarasy 25-nji awgustda Monakoda geçiriler.
Çempionlar ligasynyň şu möwsüminde toparçalarda çykyş etjek 22 klub: “Real Madrid”, “Barselona”, “Atletiko”, “Lester Siti”, “Arsenal”, “Tottenham”, “Bawariýa”, “Borussia D.”, “Baýer”, “Ýuwentus”, “Napoli”, “Benfika”, “Sporting”, PSŽ, “Lion”, SSKA M., “Dinamo K.”, PSW, “K. Brýugge”, “Bazel”, “Beşiktaş”, “Sewilýa”.
3-nji saýlama tapgyrynyň bijeleri:
Çempion klublar:
“Rosenborg” (Norwegiýa)–APOEL (Kipr), “Dinamo Zagreb (Horwatiýa)–“Dinamo Tbilisi” (Gruziýa), “Olimpiakos” (Gresiýa)–“Hapoel Be’er Şewa” (Ysraýyl), “Astana” (Gazagystan)–“Seltik” (Şotlandiýa), “Trençin” (Slowakiýa)–“Legia Warşawa” (Polşa), “Wiktoria Plžen” (Çehiýa)–“Karabag” (Azerbaýjan), “Astra Giurgiu” (Rumyniýa)–“Kopenhagen” (Daniýa), “BATE Borisow” (Belarus)–“Dundalik” (Irlandiýa), “Ludogores” (Bolgariýa)–“Srwena Zwezda” (Serbiýa), “Partizani” (Albaniýa)–“Red Bull Salsburg” (Awstriýa).
Çempion däl klublar:
“Aýaks” (Gollandiýa)–PAOK (Gresiýa), “Sparta” (Çehiýa)–“Stýaua” (Rumyniýa), “Şahtýor Donesk” (Ukraina)–“Ýang Boýz” (Şweýsariýa), “Rostow” (Russiýa)–“Anderleht” (Belgiýa), “Fenerbahçe” (Türkiýe)–“Monako” (Fransiýa).
