Paýtagtymyz Aşgabatda Telearagatnaşyk, telemetriýa, habar beriş tilsimatlarynyň we teleradioýaýradyş enjamlarynyň «Türkmentel — 2019» atly XII halkara sergisi hem-de ylmy maslahaty geçirilýär. Türkmenistanda maglumat-kommunikasiýa tehnologiýalar ulgamynda ýetilen üstünlikleri görkezmek maksady bilen geçirilýän “Türkmentel-2019” atly XII halkara sergisi sebit boýunça maglumat-kommunikasiýa tehnologiýalar ulgamyndaky iň uly çäreleriň biri bolup durýar. Bu iri çäre ýokary tehnologiýalar, innowasiýalar we telekommunikasiýa ugry boýunça täze üstünlikleri, tejribeleri we pikirleri ara alyp maslahatlaşmak mümkinçiligini berýär.
Ýurdumyzyň söwda-senagat edarasynyň sergiler merkezinde geçirilýän bu sergä ýerli we daşary ýurt kompaniýalarynyň gatnaşmagynda 90-dan gowrak diwarlyk ýerleşdirildi.
Sergidäki giň diwarlyklarda häzirki zaman wideoenjamlary, yşykly bannerler we pannolar, sanly radio we teleýaýlymlar, hemra, mobil we elektron aragatnaşygy, ses serişdeleri, wideoýazgylar we gözegçilik ulgamyndaky köp sanly täzeçil nusgaly enjamlar ýerleşdirilipdir.
Bu halkara sergä we ylmy maslahata telekommunikasiýa ulgamynda netijeli hyzmatdaşlygyň ösdürilmegine gyzyklanma bildirýän daşary ýurt kompaniýalary we işewürleri hem gatnaşýarlar. Ýöriteleşdirilen forumyň ýurdumyzyň hünärmenleri bilen daşary ýurtly hyzmatdaşlaryň özara tejribe alyşmagynda, geljekde giň gerimli gatnaşyklary ýola goýmakda hem-de özara bähbitli taslamalary ara alyp maslahatlaşmakda uly ähmiýete eýedir.
