Italiýanyň çempionaty “Serie A-nyň” soňky 5 ýylynyň çempiony “Ýuwentus” topary “Napoliniň” argentinaly hüjümçisi Gonzalo Higuaini transfer etdi. Bu transfer üçin 90 million ýewro tölän (oýunçynyň şertnamasy esasynda) turinliler 28 ýaşly hüjümçi bilen 5 ýyllyk ylalaşyk gazandy. Higuain täze klubundan ýyllyk 7 million ýewro hak alar. Geçen möwsüm 35 oýunda 36 gol geçirip, “Serie A-nyň” 87 ýyllyk rekordyna şärik bolan Higuain “Ýuwentusda” 9-njy belgide çykyş eder. Şunlukda, ol öňki toparynyň ýyldyzlary Garet Beýl (101 million ýewro) we Kristiano Ronaldodan (94 million ýewro) soň, futbol dünýäsiniň iň gymmat 3-nji transferi diýlip hasaba alyndy. “Ýuwentus” ökde hüjümçiniň karýerasyndaky 4-nji klub bolar. 2005-nji ýylda “Riwer Pleýtde” futbola başlan Higuain 2007–2013-nji ýyllarda “Real Madridiň” köýnekçesini geýdi. 2013-nji ýylyň tomsunda-da 40 million ýewro “Napoli” toparyna transfer bolupdy. Argentinanyň milli ýygyndysynda-da 63 oýunda 30 gol geçiren Higuainiň umumy transferleriniň bahasy 144 million ýewro ýetdi. Şeýlelikde, ol bu sanawda-da Anhel Di Mariýa (179 million ýewro) we Zlatan Ibrahimowiçden (169 million ýewro) soň 3-nji ýeri eýeleýär.
Ýeri gelende aýtsak, Higuain “Ýuwentusyň” bu möwsümdäki 5-nji transferidir. Şeýle-de toparyň fransiýaly oýunçysy Pol Pogbanyň öňümizdäki günlerde “Mançester Ýunaýtede” 130 million ýewro baha transfer bolmagyna garaşylýar.
Şertnamasyndaky “90 million ýewrony getiren alyp biler” diýen madda laýyklykda, ýokary baha transfer edilen Higuainiň “Napolini” terk etmegi toparyň janköýerleriniň hem-de ýolbaşçylarynyň nägileligine sebäp boldy. Onuň kluby taşlap, onda-da “Ýuwentusa” gitmegini dürli-dürli usullar bilen ýazgardylar. Ýogsam, janköýerler ony Maradonadan soň, klubuň iň esasy oýunçylarynyň biri hökmünde görüp başlapdylar.
