2020-nji ýylyň 12-nji fewralynda Sankt-Peterburg şäheriniň
Gubernatory A.D.Beglowyň ýolbaşçylygyndaky Russiýa Federasýasynyň
wekilçilikli wekiliýeti Aşgabada geldi.
13-nji fewralda günüň birinji ýarymynda ýokary derejeli myhman
Türkmenistanyň Prezidenti Gurbanguly Berdimuhamedow tarapyndan kabul
edildi. Duşuşygyň barşynda taraplar syýasy, ykdysady we medeni-
ynsanperwer häsiýetli meseleleriň giň toplumyny ara alyp maslahatlaşdylar.
Türkmenistanyň RF-niň sebitleri bilen özarahereketleriniň ikitaraplaýyn
hyzmatdaşlygyň gün tertibinde möhüm orna eýe bolup durýandygy bellenilip
geçildi.
Soňra A.D.Beglowyň Türkmenistanyň Ministrler Kabinetiniň
Başlygynyň orunbasary, Daşary işler ministri R.Meredow bilen duşuşygy
geçirildi. Taraplar iki ýurduň Baştutanlarynyň özara saparlarynyň türkmen-
rus gatnaşyklarynyň ösüşinde aýratyn ähmiýete eýe bolup durýandygyny
nygtadylar. Halkara we sebitleýin guramalarynyň çäklerinde hyzmatdaşlyk
etmegiň oňyn tejribesi bellenilip geçildi. Bu ugurda Türkmenistanyň sebitde
hem-de onuň çäginden daşarda parahatçylygyň, durnuklylygyň we ykdysady
ösüşiň saklanylmagyna gönükdirilen başlangyçlary aýratyn nygtaldy.
Taraplar rus kompaniýalarynyň birnäçesiniň Türkmenistanyň çäginde
alnyp barylýan taslamalara işjeň gatnaşmaklary bilen bir hatarda söwda-
ykdysady gataşyklarynyň ýokary derejesi barada gürrüň etdiler. Nebitgaz we
ulag ulgamlaryndaky häzirki we geljegi uly taslamalara seredilip geçildi.
Şeýle-de bilim, ylym, medeniýet, sungat we sport ulgamlaryndaky
hyzmatdaşlyk hem ara alnyp maslahatlaşyldy. Dürli ugurlar, aýratyn hem
ýokary tehnologiýalar ulgamynda bilermenlik başarnyklarynyň alyşylmagy
üçin zerur bolan kadalaşdyryjy binýadynyň kemala getirilmegi arkaly
Türkmenistanyň we Russiýanyň ýokary okuw mekdepleriniň arasynda
hyzmatdaşlygyň ýola goýulmagynyň meselelerine seredilip geçildi.
Iki ýurduň baý medeniýeti hakynda gürrüň etmek bilen taraplar
Türkmenistanda we Sankt-Peterburgda medeni çäreleriň geçirilmeginiň
üstünlige eýe bolýandygyny nygtadylar hem-de bu ugurdaky hyzmatdaşlygyň
geljekde hem dowam etdiriljekdigine umyt bildirdiler.
Duşuşygyň ahyrynda taraplar iki ýurduň ikitaraplaýyn gatnaşyklaryň
mundan beýläk hem pugtalandyrylmagyna ygrarlydyklaryny tassykladylar
we Türkmenistanyň Ministrler Kabinetiniň Başlygynyň Orunbasary,
Türkmenistanyň Daşary işler ministri R.Ö.Meredow bilen Russiýa
Federasiýasynyň Sankt-Peterburg şäheriniň gubernatory A.D.Beglowyň
arasynda geçirilen gepleşikleriň netijeleri boýunça Teswirnama gol çekdiler.
