“Huawei” kompaniýasy “Mate Xs” atly eplenýän ekranly täze telefonyny tanyşdyrdy. Öňümizdäki aý satuwa çykaryljak smartfonyň ekrany açylanda 8 dýuým, ýapylanda bolsa, bir tarapynda 6,6, beýleki tarapda 6,38 dýumlyk ekran emele gelýär. Geçen ýyl satuwa çykarylan “Mate X” modelinde bolşy ýaly bu telefonyň hem aşagynda çykgyt goýulmagy makul bilnipdir. Mundan ozal enjamyň hytaý bazaryna niýetlenen görnüşi tanyşdyrylypdy. Täze smartfonda 5G, 8 GB RAM we 512 GB içki ýat bilen enjamlaşdyrylan. Telefonyň gapdalynda jemi 4 kamera ýerleşdirilipdir. Telefonda esasy kamera 40 MP durulygynda, şeýle hem 20 MP we 8 MP durulygynda ýene iki kamera bar. Dördünji kamera bolsa, çuňluk sensory (ToF ) bolup, uzakdaky zatlary dury surata ýagdaýda almaga niýetlenipdir. Smartfonyň bahasynyň 2700 dollardygy mälim edildi. “Android 10” amaly ulgamynda işleýän enjamda “Google” applikasiýalary göz öňünde tutulmandyr. Telefonda “Play Store”-yň ýerine “AppGallery” atly kompaniýanyň öz applikasiýa dükany ýerleşdirilipdir. Ýeri gelende aýtsak, täze peýda bolan “AppGallery”-den dünýäniň 170 ýurdunda 400 milliondan gowrak ulanyjysynyň bardygy mälim edildi. Bu barada maglumat beren kompaniýanyň ýolbaşçysy Riçard Ýu “AppGallery”-de habar, jemgyýetçilik mediýasy, güýmenje ýaly 18 ugura degişli applikasiýalaryň bardygyny aýtdy. Geçen ýyl peýda bolup başlan eplenýän ekranly smartfonlary häzirki wagtda “Huawei” bilen bir hatarda “Samsung”, “Motorola” ýaly kompaniýalar öndürýär.
