“Jumeýra palmasy” adasyna ýöne ýere dünýäniň sekizinji täsinligi diýilmeýär. Dubaýyň kenaryndaky bu üýşürilip galdyrylan emeli ada, Pars aýlagyndaky adam eli bilen bina edilen hakyky täsinlik bolup, ol dünýäniň ajaýyp ýaşaýyş zolaklarynyň we abraýly şypahanalarynyň biri hasaplanýar. Adanyň meýdany 600 futbol meýdançasyna deň bolup, bu ýagdaý ony hemra gözegçiligi arkaly aňsat saýgarmaga mümkinçilik berýär. Ol Dubaýyň emeli “palma adalary” toparynyň bir bölegi bolup, yklymyň kenar ýakasyny giňeltmek we jahankeşdeleri özüne çekmek maksady bilen guruldy.
Bu adanyň gurluşygynda hiç hili metal gurluş ulanylmandygy bellärliklidir. Adanyň töwereginde tolkunlardan goraýan 11 kilometrlik gaçy bar. Şeýle hem, bu ýerdäki myhmanhanalaryň howuzlary we plýažlary daşgyn wagty arassa deňiz suwy bilen täzelenýär. Emeli adada 80 müň töweregi adam hemişelik ýaşaýar. “Jumeýra palmasy” köp sanly kaşaň myhmanhanalary we güýmenjeli infrastrukturasy bilen tapawutlanýar. Bu ýerdäki onlarça gat binalar, suwasty otaglar köpüň göwnünden turýar. Mysal üçin, bu ýerde dünýä derejesindäki akwapark we akwariumlar ulgamy bolup, olarda deňiz faunasynyň 65 müň jandary ýaşaýar.
Akulalardan gorkmaýanlar üçin, adaty bolmadyk suwasty gezelençler guralan. Bu ýere gelýänler emeli adanyň gözelliklerini guşuçar belentlikden synlamak üçin, iki adamlyk uçara münüp, asmana göterilýärler. “Jumeýra palmasy” adasynyň 80 kilometre golaý kenar ýakasynda täsin plýažlar we dynç alyş merkezleri bar. Mysal üçin, adanyň gündogarynda “Vista mare” toplumy ýerleşip, ol ýerde garbanyşhanalar we göni deňze çykýan howuzlar bar. Adadaky “Palma diňi” atly täze gurluşyk 50 gatdan ybarat bolup, onuň depesinden seredeniňde, bu ada edil eliň aýasynda ýaly görünýär.
