Formula 1 boýunça täze möwsümde 21 ýaryş (häzirlikçe) geçiriler. F1-iň 71-nji möwsüminde toparlaryň 10-sy çykyş edip, olaryň adyndan 22 sürüji ýaryşa gatnaşar (her topardan 2 sürüji). Möwsümiň 2-nji ýaryşy bolan Bahreýn “Gran Prisi” 22-nji martda geçiriler. Ol F1-iň taryhynda tomaşaçysyz guraljak ilkinji bäsleşik bolar. 5-nji apreldäki Wýetnam “Gran Prisi” bilen 3-nji maýdaky Niderlandlar “Gran Prisi” sanawa täze goşulan ýaryşlardyr. F1 ýaryşy Wýetnamda ilkinji sapar guralsa, Niderlandlarda 1985-nji ýyldan soň 1-nji gezek geçiriler. Dürli sebäplere görä, ýaryşlaryň geçiriliş tertibine käbir üýtgeşmeler girizilmegi mümkin. Ýagny käbir ýaryşlaryň geçiriljek wagty süýşürilip bilner, hatda “Gran Prileriň” käbileriniň geçirilmezligi hem ahmal. Möwsüm 29-njy noýabrda Abu Dabi “Gran Prisi” (BAE) bilen jemlener.
Çempionata gatnaşjak toparlarda üýtgeşiklik bolman, toparlaryň käbirleriniň hemaýatkärleri çalyşdy. Geçen ýylda-da ýaryşan “Ferrari” (Italiýa), “Mercedes” (Germaniýa), “Haas” (ABŞ), “Renault” (Fransiýa), “Racing Point” (B. Britaniýa), “MacLaren” (B. Britaniýa), “Red Bull” (Awstriýa), “Williams” (B. Britaniýa), “Alfa Romeo” (Şweýsariýa) hem-de “Alpha Tauri” (Italiýa, ozalky “Toro Rosso”) toparlary bu ýylda hem çempionata gatnaşarlar.
F1-iň soňky 6 möwsüminde “Mercedes” topary hem konstruktorlaryň, hem-de sürüjileriň arasynda çempionlygy özünde saklap gelýär. Bu görkeziji rekorda deň bolup, “Mercedes” topary rekordy “Ferrari” bilen paýlaşýar. Nemes toparynyň esasy maksady, bu ýylda-da goşa çempionlyk gazanyp, rekordy öz adyna geçirmek.
Sürüjileriň arasynda çempionlygyň iň esasy dalaşgäri gürrüňsiz soňky 6 ýylda 5 gezek çempion bolan Lýuwis Hamiltondyr (“Mercedes”). Umumylykda F1-iň 6 gezek çempionlygyny gazanan britaniýaly sürüji ýeňişleriniň hataryna ýene birini goşup, Mihael Şumaheriň rekordyny gaýtalamakçy bolýar. Şeýle-de Hamiltonyň topardaşy Waltteri Bottas, “Ferrariniň” sürüjileri Sebastian Wettel bilen Şarl Lekler dagy hem çempionlygyň beýleki dalaşgärleri hasaplanýar.
