Köpetdagyň owadan künjeginde ýerleşýän Halkara ahalteke atçylyk sport toplumy bu ýere baranlary beýikligi 20 metre barabar bolan asmana göterilmäge hyýal edýän bäş sany ajaýyp bedewiň heýkeli bilen garşy alýar.
Edil janly ýaly şekillendirilen bürünç bedewleriň arka tarapynda atçylyk sport toplumynyň iki sany belent ötügi bolan girelgesi bar. Deňi-taýy bolmadyk bu uly toplumyň umumy meýdany 90 gektardan gowrak bolup, ol köp sanly desgalary özünde jemleýär. Desganyň gurluşygyna 2009-njy ýylda badalga berlipdi. Halkara ahalteke atçylyk sport toplumynda merkezi çapuw ýodasynyň umumy uzynlygy 2 müň metr bolup, kiçileri 1800 metrdir. Şeýle hem bu ýerde 1900 metrlik otly we 1800 metrlik beton ýodalar bar. Çapyşyk günlerinde boş orun bolmaýan tomaşaçy üçin niýetlenen tribunalar 7 müň orunlykdyr. Tribunanyň aşagyndaky birinji gatda aýlawyň edara ediş, hojalyk we gulluk otaglary ýerleşdirilipdir, olarda toplumyň işgärleriniň netijeli işi üçin ähli zerur şertler döredilipdir. Binanyň ikinji gatynda oňaýly eýwanlar we çaýhana bar. Ol ýerde süýji tagamlar, şol sanda milli aşhananyň datly naharlary hödürlenýär. Üçünji gatda bolsa 52 orunlyk myhmanhana we SIP – tomaşa zaly bar. Dördünji gatda belent mertebeli myhmanlar üçin ýörite tomaşa zaly bar. Halkara ahalteke atçylyk sport toplumy iri halkara ýaryşlaryny, ýaşlar spartakiadalaryny, dünýä derejesindäki açyk birinjiligi we ýaryşlary geçirmäge doly mümkinçilik berýär.
“Flemington Racecourse”
Awstraliýanyň Melburn şäherindäki bu aýlaw 1840-njy ýylda gurulýar. “Flemington” ady bilen meşhurlyga eýe bolan bu aýlawda atçylyk sportuna degişli birnäçe ýaryş geçirilýär. Aýlaw ululygy boýunça tapawutlanyp, ol 120 müň janköýere niýetlenendir. 2006-njy ýylda “Victoria Derby” atly at çapyşygy ýaryşyna 130 müňe golaý janköýer tomaşa etdi. Bu taryhy aýlawda her ýyl Melburn Kubogy, “Victoria Derby”, “LKS Mackinnon Stakes”, “Emirates Stakes”, “Newmarket Handicap” hem-de Awstraliýa Kubogy ýaly iri at çapyşygy ýaryşlary geçirilýär.
“Golden Gate Fields”
ABŞ-nyň Kaliforniýa ştatynda ýerleşýän bu aýlaw ýurtdaky iň esasy aýlaw hasaplanýar. XIX asyryň ikinji ýarymyndan bäri dürli ýaryşlaryň geçirilýän aýlawy 1941-nji ýylda täzeden gurulýar. Bu aýlawda ýylyň dowamynda “El Camino Real Derby”, “All American Stakes”, “San Francisco Mile Stakes”, “California Derby”, “Berkeley Handicap”, “California Oaks” ýaly ýurduň iri ýaryşlary geçirilýär.
“Hippodrome de Longchamp”
Sena derýasynyň kenaryndaky Bulon tokaýlygynda ýerleşýän bu aýlawyň tutýan meýdany 57 gektara deňdir. Fransiýanyň paýtagty Pariždäki bu aýlawda ilkinji at çapyşygy 1857-nji ýylyň 27-nji aprelinde geçirilýär. Birnäçe aýlaw ýodasyny özünde jemleýän aýlaw 50 müň tomaşaça niýetlenendir. Häzirki wagtda bu ýerde Ýewropanyň iň abraýly ýaryşy hasaplanylýan “Prix de l’Arc de Triomphe” kubogy ýaryşy geçirilýär.
“Maydan Racecourse”
Birleşen Arap Emirlikleriniň belli şäheri Dubaýda ýerleşýän bu aýlaw 2010-njy ýylda guruldy. 60 müň orunlyk bu aýlaw özüniň owadanlygy bilen tapawutlanýar. Aýlawyň çäginde 5 ýyldyzly myhmanhana, şeýle-de at esbaplaryny, atçylyk sportuna degişli enjamlary özünde jemleýän özboluşly muzeý, bu ýere gelenleriň naharlanmagy üçin dürli tagamlary taýýarlaýan restoranlar bar.
“Aintree Racecourse”
Angliýanyň Liwerpul şäheriniň Eýntri şäherçesinde ýerleşýän bu aýlaw 1829-njy ýylda açylýar. Dabarasy dag aşan bu aýlawda 1839-njy ýyldan bäri dünýäniň iň abraýly ýaryşlarynyň biri hasaplanýan “Grand National” päsgelçilikli at çapyşygy bäsleşigi geçirilip gelinýär.
