“Fujifilm” professional fotoapparatlary kompýuterlerde wideomaslahatlar üçin ulanmaga mümkinçilik berýän programmany işläp taýýarlady. Şeýlelikde, kompýuterlerde uzak aralykdaky adamlar bilen maslahat geçirilende ýa-da widoejaň arkaly habarlaşylanda fotoapparaty kompýuterleriň web-kamerasy hökmünde ulanyp bolýar. Ýapon şereketi web-kamera hökmünde adaty fotoapparatyň ulanylmagynyň has ýokary durulykdaky suraty hem üpjün etjekdigini mälim etdi. Soňky wagtlarda uzak aralykdan geçirilýän maslahatlar web-kameralaryň satuwyny ýokarlandyrdy. Ýapon brendi bolsa, şeýle enjama islegiň ýokarydygyny göz öňünde tutup, adamlaryň özlerinde bar bolan enjamy bu maksat bilen ulanmaga mümkinçilik berýän programmany düzmegi makul bilipdir. Şeýlelikde, özünde fotoapparaty bar bolan adamlar täze kamera almagyň ýerine öz fotoenjamlaryny ulanyp bilerler. Ondan peýdalanmak üçin täze döredilen programmany kompýuteriňe gurandan soňra fotoapparaty USB geçiriji arkaly birikdirmek ýeterlik. Häzirlikçe bu programmany diňe “Windows 10” amaly ulgamly kompýuterlerde ulanyp bolýar.
