Hormatly Prezidentimiziň baştutanlygynda ýurdumyzda we tutuş dünýäde halkara baýram – Bütindünýä welosiped güni giňden bellenilip geçilýär. Bu baýramçylyk hormatly Prezidentimiziň hut özüniň başlangyjy esasynda Birleşen Milletler Guramasynyň Baş Assambleýasynyň her ýylyň 3-nji iýunyny Bütindünýä welosiped güni diýip yglan etmek hakyndaky karary esasynda bellenilýär.
Bu şanly baýramçylyk mynasybetli paýtagtymyz Aşgabadyň günorta böleginde Köpetdagyň etegine ajaýyp desga – Welosiped binasy guruldy. Bütindünýä welosiped güni mynasybetli bu binanyň ulanmaga berilmeginiň hem özboluşly uly manysy bar.
Hormatly Prezidentimiziň gatnaşmagynda ulanmaga berlen Welosiped binasynyň açylyş dabarasyna ýurdumyzyň hökümet agzalary, Türkmenistandaky daşary ýurtlaryň diplomatik wekilhanalarynyň we halkara guramalarynyň ýolbaşçylary, ýurdumyzyň ministrlikleriniň we pudak edaralarynyň ýolbaşçylary we işgärleri, ýokary okuw mekdepleriniň rektorlary we talyplary, paýtagtymyzyň köp sanly ýaşaýjylary gatnaşdy.
Hormatly Prezidentimiz bu ýere ýygnananlara gutlag sözi bilen ýüzlendi. Milli Liderimiz baýramçylyk dabaralaryna gatnaşanlary Bütindünýä welosiped güni bilen gutlap, bu halkara baýramçylygyň biziň ýurdumyzda giňden we dabaraly ýagdaýda bellenilýändigini aýtdy. Hormatly Prezidentimiz ýurdumyzda bedenterbiýe we sporty dünýä derejesine çykarmak babatda giň gerimli işleriň alnyp barylýandygyny belledi.
Soňra hormatly Prezidentimiziň gatnaşmagynda köpçülikleýin welosiped ýörişi geçirildi. Oňa watandaşlarymyzyň müňlerçesi gatnaşdy.
12 kilometrlik welosiped ýörişi paýtagtymyzyň merkezindäki döwlet münberinde tamamlandy.
