Üç aýlyk arakesmeden soň, futbol janköýerleriniň söýgüli çempionatlarynyň biri bolan “La Liga” hem şu gün badalga berilýär. 28-nji tapgyryň ilkinji duşuşygy derbi duşuşygy bolup, Andalusýa derbisinde “Sewilýa” öz meýdançasynda “Betisi” kabul eder. Duşuşyk şu gün ýarygijeden soň, Aşgabat wagty bilen 01:00-da başlanar we Türkmenistan Sport teleýaýlymy arkaly hem göni efirde görkeziler. 28-nji tapgyrda sanawyň lideri “Barselona” 13-nji iýunda myhmançylykda “Malýorka” bilen duşuşar. “Barselonadan” 2 utuk yzda barýan “Real Madrid” bolsa 14-nji iýunda Santiago Bernabeuda “Eýbary” kabul eder. Duşuşyklaryň ählisiniň-de janköýersiz boljakdygyny ýatladýarys.
Bu tapgyryň duşuşyklary tamamlanyp-tamamlanmanka, “La Ligada” 29-njy tapgyryň oýunlaryna badalga berler. 29-njy tapgyryň oýunlary 15-18-nji iýun aralygynda geçiriler.
