Şu gün Italiýanyň Kubogy ýaryşynda ýarym finalyň jogap oýunlaryna badalga berler. “Ýuwentus” öz meýdançasynda “Milany” kabul eder. Duşuşyk Aşgabat wagty bilen 00:00-da başlap, ol Türkmenistan Sport teleýaýlym arkaly türkmen futbol janköýerleriniň dykgatyna ýetiriler. Iki toparyň arasynda fewral aýynda oýnalan 1-nji duşuşyk 1-1 deňlikde tamamlanypdy. Duşuşykda “Ýuwentusdan” Kristiano Ronaldonyň, Paolo Dibalanyň esasy düzümde meýdança çykmagyna garaşylýar. “Milanda” bolsa, az-owlak şikesi bolan Zlatan Ibrahimowiç Turin şäherine baran toparyň düzümine alynmady.
Şeýle-de, ýarym finalyň beýleki bir duşuşygy ertir Neapol şäherinde ýerli “Napoli” bilen “Interiň” arasynda oýnalar. Bu duşuşyk hem Aşgabat wagty bilen ýarygije 00:00-da başlap, Türkmenistan Sport teleýaýlymy arkaly göni efirde görkeziler. Mälim bolşy ýaly 1-nji duşuşykda “Napoli” 1–0 hasabynda ýeňiş gazanypdy.
Ýarym finalyň ýeňijileri 17-nji iýunda finalda duşuşarlar. Final duşuşygy Rimdäki Olimpiýa stadionynda oýnalar.
