Peläniň 1-nji, Maradonanyň 2-nji çempionlygy
Sportuň taryhynda şu gün hem taryhy wakalara baý günleriň biri bolupdyr. 1895-nji ýylda Londonyň meşhur toparlaryndan “West Ham Ýunaýted” esaslandyrylýar. Şeýle-de, Latyn Amerikanyň iki ezeli bäsdeşi, Dünýä futbolynyň iki läheňi Braziliýa bilen Argentina degişlilikde, 1-nji hem-de 2-nji gezek Dünýä Kubogyny gazanýar. Braziliýa 1958-nji ýylda Şwesiýada geçirilen 6-njy çempionatyň finalynda ýer eýelerini 5-2 hasabynda utýar. Bu futbolyň şasy Peläniň ilkinji çempionlygy bolýar. Şeýle-de 1986-njy ýylda Meksikada geçirilen Dünýä Kubogynda Argentinanyň ýygyndysy Maradonanyň ýolbaşçylygynda finala çykýar. Super ýyldyz finalda gol geçirip bilmese-de, toparynyň ýeňiş golunyň pasyny berýär. Günbatar Germaniýany 3–2 ýeňen Tangoçylar 2-nji gezek Dünýäniň çempiony diýen ady eýeleýärler. Taryhda şu gün ýene bir çempion belli bolýar. 2008-nji ýylda Awstriýa bilen Şweýsariýanyň bilelikde guran 13-nji Ýewropa çempionatynyň finalynda Ispaniýanyň ýygyndysy Germaniýany Fernando Torresiň ýeke-täk goly bilen 1–0 utup, 44 ýyldan soň, 2-nji gezek yklymyň iň uly kubogyny asmana göterýär.
1895 – Angliýanyň paýtagty Londonyň meşhur topary “West Ham Ýunaýted” esaslandyrylýar. Klub ilki “Thames Ironworkers” diýen at bilen döredilýär. Ýöne 1900-nji ýylda bu klub ýatyrylýar we şol ýylyň 5-nji iýulynda “West Ham Ýunaýted” ady bilen täzeden döredilýär.
Pele 17 ýaşynda kubogy asmana göterýär
1958 – Şwesiýada geçirilen 6-njy Dünýä Kubogy ýaryşynyň finalynda Braziliýa bilen ýer eýeleri Şwesiýanyň ýygyndylary duşuşýar. Solnada “Rasunda” stadionynda oýnalan bu duşuşykda Braziliýa Wawa (2), Pele (2) hem-de Zagallonyň gollary bilen 5-2 hasabynda ýeňip, ilkinji çempionlygyny gazanýar. Braziliýa başga yklymda çempionlyk gazanan ilkinji topar bolýar. Rekord köp ýyllap Braziliýada galýar.
Maradona we ýoldaşlary
1986 – Futbol boýunça Meksikada geçirilen Meksikada geçirilen Dünýä Kubogynyň finalynda Argentinanyň ýygyndysy Günbatar Germaniýany 3-2 hasabynda ýeňlişe sezewar edýär. Paýtgat Mehiko Sitidäki “Azteka” stadionynda oýnalan finalda argentinler Brown hem-de Waldanonyň gollary bilen 2-0 öňe saýlanýar. 6-njy minutda Rummenigge hem-de Rudi Fölleriň gollary bilen nemesler hasaby deňleýär. 83-nji minutda-da Maradonanyň pasyndan soň, Burriçago Latyn amerikylalara ýeňiş getiren goly derwezä girizýär. Duşuşyga 114 600 janköýer tomaşa edýär.
1988 – Argentinaly futbolçy Ewer Banega ýurduň Rosario şäherinde dünýä inýär.
1991 – Amerikaly basketbolçy NBA-nyň çempiony, Final oýunlarynyň iň gymmatly oýunçysy Kawhi Leonard dünýä inýär.
2008 – Futbol boýunça Awstriýa bilen Şweýsariýanyň bilelikde guran 13-nji Ýewropa çempionatynyň finalynda Ispaniýanyň ýygyndysy Germaniýany 1-0 hasabynda ýeňýär. Ispan toparyna 44 ýyldan soň, çempionlyk gazandyran ýeke-täk goly 33-nji minutda Fernando Torres derwezä girizýär.
