Russiýanyň Kubok ýaryşynyň finalçylary belli boldy. Ilkinji finalçy tamamlanyp barýan möwsümi 2-nji ligada geçiren “Himki” topary bolup, olar ýarym finalda “Uraly” 3–1 hasabynda ýeňdi. Sergeý Ýuranyň tälim berýän toparyny finala çykaran gollary Gapon (11), Troşeçkin (36) hem-de Polýarus (37) derwezä girizdi. Täze möwsümde “Premýer ligada” çykyş etjek “Himki” 2005-nji ýylda-da finala çykypdy.
Beýleki ýarym finalda bolsa, “Zenit” bilen “Spartak” duşuşdy. Esasan hem 1-nji ýarymy çekeleşikli geçen oýunda “Zenit” 2–1 hasabynda ýeňiş gazandy. Sankt-peterburglylara ýeňiş getiren gollary 24-nji minutda penaltiden Dzýuba bilen 45+3-nji minutda Kuzýaýew derwezä girizdi. Moskwalylaryň ýeke-täk goluny 45+1-nji minutda Sobolew öz adyna ýazdyrdy. Netijede, “Zenit” 5-nji gezek finalda oýnamaga hukuk gazandy.
“Himki” bilen “Zenitiň” arasyndaky final duşuşygy 25-nji iýulda Ýekaterinburgdaky “Sentralnyý” stadionynda oýnalar.
