“Times Higher Education” (THE) şereketi 12 ýyldan bäri dünýäniň öňdebaryjy okuw mekdepleri barada maglumat taýýarlaýar. Ylym-bilim edaralaryna baha berýän şereketler, esasan, talyplara bilim berlişini, olaryň täze açyşlara, ylmy barlaglara näderejede üns berýändigini nazarda tutýarlar. THE şereketiniň sanawynda Oksford uniwersiteti birinji ýeri eýeledi. Iňlis uniwersitetinden soňra Kaliforniýanyň Tehnologiýa uniwersiteti ikinji ýeri aldy. Bu okuw mekdebi häzire çenli sanawda bäş gezek birinji bolupdy. Häzire çenli birinjiligi diňe amerikan okuw mekdepleri eýeledi. Sanawda üçünji orun Stanford uniwersitetiniň paýyna düşdi. Ilkinji onluga ABŞ-dan 6, Birleşen Patyşalykdan 3, Şweýsariýadan 1 uniwersitet girdi.
Geçen ýylky sanawda 800 okuw mekdebine baha berlipdi. Bu ýylky sanawda 79 ýurtdan 980 uniwersitet bar. Dünýäniň öňdebaryjy uniwersitetleriniň agramly bölegini iňlis dilinde bilim berýän okuw jaýlary emele getirýär. Şeýle hem Gollandiýadaky ähli ylmy-barlag institutlary sanawda özüne orun tapdy. Şol sebäpli soňky ýyllarda Gollandiýada okamaga isleg bildirýänleriň sany barha artýar. Ýurtdaky okuw mekdepleriniň 8-si birinji ýüzlüge, 5-si ikinji ýüzlüge, 12 şäherden 13 uniwersitet ondan soňky orunlara mynasyp boldy.
Ilkinji onlukda Kembrij, MIT (Massaçusets Tehnologiýa instituty), Harward, Prinston, London Patyşalyk kolleji, Şweýsar tehnologiýa instituty we Berkeli ilkinji onlukda özüne orun tapan beýleki mekdepler boldy.
Umumy sanawda ABŞ-dan 148, Angliýadan 91, Ýaponiýadan 69, Hytaýdan 52, Germaniýadan 41, Italiýadan 39, Awstraliýadan 35, Hindistandan 31, Fransiýadan we Ispaniýadan 27, Kanadadan 26, Günorta Koreýadan 25, Russiýadan 24, Türkiýeden 18 uniwersitet bar.
