“Çelsiniň” braziliýaly ýyldyzy Oskar hem Hytaýyň “Super ligasyna” transfer bolan futbolçylaryň hataryna goşuldy. 25 ýaşyndaky hüjüme golaý ýarymgoragçy Hytaýyň “Şanhaý SIPG” topary bilen uzak möhletleýin şertnama baglaşdy. Hytaý kluby Oskar üçin 60 million funt sterlingi “Çelsi” toparyna berer. Şunlukda, Oskar Hytaý “Super ligasynyň” iň gymmat transferi diýlip hasaba alyndy. Oskardan öňki rekord hem bu toparyň başga bir braziliýaly oýunçysyna – Hulka degişlidi. Portugaliýaly Andre Willaş-Boaşyň tälimçiligindäki “Şanhaý SIPG” topary geçen tomusda Hulky 55,8 million ýewro baha “Zenitden” alypdy.
Antonio Kontäniň wezipä bellenip, toparyň oýnaýyş taktikasyny 3–4–3 ulgamyna öwürmeginden soň, ätiýaçda oturmaly bolan Oskar “Çelsiden” hepdede 90 müň funt sterling hak alýardy. Ol täze klubundan ondan 4 esse artyk pul alar. Oskar “Çelsiniň” klubdan ugradan iň gymmat oýunçysy boldy.
