Sagdynlyk we ruhubelentlik ýylyna gadam basyp, şu ýylyň güýzünde geçiriljek Ýapyk binalarda we söweş sungaty boýunça V Aziýa oýunlara barha golaýlaşýarys. Yklymyň bu iri ýaryşyna toplumlaýyn taýýarlyk görmegiň barşynda açyk metbugat ýygnagy geçirildi.
Paýtagtymyzdaky Olimpiýa şäherjiginiň Işewürlik merkezinde geçirilen maslahata Aziada-2017-niň Ýerine ýetiriji komitetiniň, Milli olimpiýa komitetiniň, Sport baradaky döwlet komitetiniň wekilleri, türkmen žurnalistleri, daşary ýurt köpçülikleýin habar beriş serişdeleriniň wekilleri we halkara sport ýaryşlaryny guramak boýunça daşary ýurt hünärmenleri gatnaşdylar.
Maslahatyň çäklerinde “Trivandi Chanzo Limited” kompaniýasynyň direktory Mik Raýt, Aziada-2017-niň Ýerine ýetiriji komitetiniň bölüm başlygy Ata Akmämmedow, Sport baradaky döwlet komitetiniň hünärmeni Röwşen Kemjäýew dagy çykyş etdiler. Olar öz çykyşynda hormatly Prezidentimiziň başlangyjy bilen ýurdumyzda ilkinji gezek geçiriljek iri sport ýaryşyna görülýän taýýarlyk işleri barada habar berdiler. Olaryň aýtmagyna görä, bu ýaryşy guramak üçin paýtagtymyzda sebitde deňi-taýy bolmadyk iri Olimpiýa şäherjiginiň gurlandygy we bu ýerde geljekde Olimpiýa oýunlary ýaly iri sport ýaryşlaryny geçirmäge giň mümkinçilikleriň döredilendigini belläp geçdiler.
“Trivandi Chanzo Limited” kompaniýasynyň direktory Mik Raýt Olimpiýa şäherjigindäki sport desgalarynyň gurluşygynda tomaşaçylar hem-de köpçülikleýin habar beriş serişdeleriniň wekilleri üçin ähli zerur amatly şertleriň döredilendigini görkezdi. Bu kompaniýa sport ýaryşlaryny gurmaka babatda örän uly tejribe eýedir. Ol öz çykyşynda iri möçberli ýaryşlaryň üstünlikli geçirilmegi üçin şu ugurlara: sport desgalarynyň içgin taslamalaşdyrylmagyna, ýaryşlara taýýarlyk görmegiň barşynda ähli kompaniýalaryň we guramalaryň utgaşykly işlemeklerine, meýletinçiler hem-de sport hünärmenleri üçin synaglaryň hem-de okuwlaryň geçirilmegini yzygiderli ýola goýulmagyna aýratyn üns bermelidigini belledi. Bu bolsa sentýabr aýynda geçiriljek toplumlaýyn bäsleşikleriň ýokary derejede guraljakdygyna ynam döredýär.
Ýaz paslynda Olimpiýa şäherjiginde nobatdaky synag ýaryşlary hökmünde kikboksing, suwda ýüzmek we agyr atletika boýunça iri halkara ýaryşlary geçiriler.
Metbugat ýygnagynyň çäklerinde oňa gatnaşyjylar öz arasynda sorag-jogap alyşdylar. Çäre gatnaşýan myhmanlar özlerini gyzyklandyrýan sowallar bilen guraýjy tarapyň wekillerine ýüzlendiler.
