Ildeşlerimiz “E” toparçada
Hepdäniň ilkinji gününde, ýagny düýn BAE-niň paýtagty Abu Dabi şäherinde Aziýa Kubogynyň 3-nji saýlama tapgyrynyň bijeleri çekildi. Oňa ýurdumyzyň ýygyndysy-da 2-nji torbadan gatnaşyp, ildeşlerimiz “E” toparça düşdi. Şol toparçada Türkmenistanyň milli ýygyndysy Bahreýniň, Singapuryň hem-de Hytaý Taýpeýiniň toparlary bilen bije çekişdi. Ildeşlerimiz bu 3 ýygyndy bilenem öň azyndan 1 gezek duşuşypdy. Milli ýygyndymyz Bahreýn bilen 2 duşuşyk geçirip birinde deňme-deň oýnasa (2–2; 1994-nji ýylda), beýlekisinde-de ýeňlipdi (5–0; 2005-nji ýylda). Singapur bilenem 1 sapar duşuşan ildeşlerimiz şol oýunda 4–2 hasabynda asgyn gelipdi. Hytaý Taýpeýi bilen 3 gezek duşuşyp, 3-sinde hem gol geçirtmezden ýeňiş gazanan türkmenistanly futbolçylar olaryň derwezesine jogapsyz 8 pökgi girizdiler (5–0, 1–0, 2–0). Türkmenistanyň ýygyndysynyň ilkinji oýny myhmançylykda Hytaý Taýpeýi bilen bolar. Bu oýun 28-nji martda oýnalar. 2-nji duşuşygyny 13-nji iýunda Aşgabatda Bahreýn bilen geçirer. Soňra 2 oýun yzly-yzyna Singapur bilen bolar – 5-nji sentýabrda myhmançylykda, 10-njy oktýabrda-da Aşgabatda. Milli ýygyndymyz toparçadaky soňky oýnuny 2018-nji ýylyň 27-nji martynda myhmançylykda Bahreýn bilen oýnar. Netijede, toparçada iň köp utugy alan 2 ýygyndy 17-nji Aziýa Kubogyna ýollanma alar. Ildeşlerimize bu jogapkärli duşuşyklarda uly üstünlikler arzuw edýäris.
2019-njy ýylda BAE-de geçiriljek 17-nji Aziýa Kubogyna 24 ýygyndy gatnaşar. Ýer eýesi BAE-den başga 11 ýygyndy – Kataryň, Günorta Koreýanyň, Ýaponiýanyň, Tailandyň, Saud Arabystanynyň, Awstraliýanyň, Özbegistanyň, Siriýanyň, Yragyň, Hytaýyň hem-de Eýranyň milli toparlary 2-nji saýlama tapgyryndan soň belli bolupdy. Galan 12 topar hem 3-nji saýlama tapgyryndan soň, aýan bolar. Ýeri gelende aýtsak, 1–2-nji saýlama tapgyrynyň oýunlary 2018-nji ýylda Russiýada geçiriljek Dünýä Kubogynyň saýlama tapgyry hökmünde geçirildi. Şonda Türkmenistanyň ýygyndysy 2-nji saýlama tapgyrynda “D” toparçada çykyş edipdi 3-nji orny eýelän Türkmenistanyň futbol topary pleý-off oýnuny geçirmezden, Aziýa Kubogynyň 3-nji saýlama tapgyryna gatnaşmaga hukuk gazanypdy.
“E” toparçada geçiriljek duşuşyklaryň tertibi:
28-nji mart 2017: Hytaý Taýpeýi–TÜRKMENISTAN, Bahreýn–Singapur
13-nji iýun 2017: TÜRKMENISTAN–Bahreýn, Singapur–Hytaý Taýpeýi
5-nji sentýabr 2017: Singapur–TÜRKMENISTAN, Bahreýn–Hytaý Taýpeýi
10-njy oktýabr 2017: TÜRKMENISTAN–Singapur, Hytaý Taýpeýi–Bahreýn
14-nji noýabr 2017: TÜRKMENISTAN–Hytaý Taýpeýi, Singapur–Bahreýn
27-nji mart 2018: Bahreýn–TÜRKMENISTAN, Hytaý Taýpeýi–Singapur
2019–BAE Aziýa Kubogynyň 3-nji saýlama tapgyrynyň toparçalary:
“A”: Gyrgyz Respublikasy, Hindistan, Mýanma, Makau
“B”: Demirgazyk Koreýa, Gonkong, Liwan, Malaýziýa
“C”: Iordaniýa, Wýetnam, Owganystan, Kamboja
“D”: Oman, Palestina, Maldiwler, Butan
“E”: Bahreýn, TÜRKMENISTAN, Hytaý Taýpeýi, Singapur
“F”: Filippinler, Täjigistan, Ýemen, Nepal
