“Super Bowlda” taryhy ýeňiş

Milli amerikan futboly ligasynyň (NFL) finaly bolan “Super Bowl ” duşuşygynda “Nýu Ingland Patriots” topary ýeňiş gazandy. Hýustondaky NRG stadionynda oýnalan 51-nji “Super Bowlda” ol “Atlanta Falkons” kluby bilen duşuşdy. 70807 janköýeriň ýygnanan oýnuna Karl Çeffers eminlik etdi. Duşuşygyň 1-nji çärýeginde hasap açylmady. 2-nji çärýekde “Atlanta Falkons” 21:3 hasabynda öňe saýlandy. Bu aratapawut 3-nji çärýegiň başlarynda hasam artdy (28:3). Ýöne ruhdan düşmedik “Pat­riots” topary 3-nji çärýekde 6 utuk gazanyp, az-owalk umytlandy. 4-nji çärýekde welin, “Pat­riots” diýseň başgaça oýun görkezdi. “Super Bowluň” has tejribeli topary bu çärýekde 19 utuk toplady. Bu bolsa hasabyň deňlenmegi diýmekdir we taryhda ilkinji gezek “Super Bowluň” ýeňijisi goşmaça wagtda belli edildi. Goşmaça wagtda-da “Nýu Ingland Patriots” super ýyldyz Tom Brediniň ýolbaşçylygynda ýene-de 6 utuk gazandy we 34:28 hasabynda ýeňşini baýram etdi. 28:3-den 34:28-e çykan hasap taryhda iň uly aratapawutdan gazanylan ýeňiş diýlip bellige alyndy. Şunlukda, 9-njy sapar finalda çykyş eden “Nýu Ingland Patriots” topary 5-nji gezek “Super Bowl” kubogyny gazandy. “Super Bowly” iň köp gazanan 2-nji topar “Nýu Ingland Patriots” mundan öň 2001-nji, 2003-nji, 2004-nji we 2014-nji ýyllarda ýeňiş gazanypdy. Bu ugurda 6 kubok bilen “Pittsburg Stilers” öňde barýar. 2-nji sapar finala çykan “Atlanta Falkons” ýene ýeňiş gazanyp bilmedi.
Duşuşygyň iň gymmatly oýunçysy saýlanan Tom Bredi (“Nýu Ingland Patriots”) bilen toparyň tälimçisi Bill Belliçik 5-nji gezek çempion bolmagy başardy.
“Super Bowl” duşuşyklarynyň amerikan halky üçin aýratyn, özboluşly ähmiýeti bar. Her ýyl millionlarça adamynyň tomaşa edýän bu çäresi diňe bir sport wakasy bolman, eýsem, ol jemgyýetçilik medeni dabara hökmünde hem görülýär. Ilkinji çaklamalara görä, 324 million ilatly ABŞ-da 111 million töweregi adam bu duşuşyga teleýaýlym arkaly tomaşa etdi. Tutuş dünýäde 170 ýurtda göni ýaýlymda görkezi­len “Super Bowl” duşuşygynyň arakesmesinde meşhur aýdymçy zenan Leýdi Gaga özüniň konsert programmasy bilen çykyş etdi. Aýratynam, onuň eden şou çykyşy dabara ýygnananlaryň we oňa teleýaýlymda tomaşa edenleriň göwünlerini galkyndyrdy. Şeýle-de duşuşygyň ara­kesmesinde teleýaýlymda görkezilen mahabatlaryň 30 sekundynyň bahasy 5 million dollar diýlip kesgitlenildi we birnäçe iri şereketler täze reklamalaryny tomaşaçylaryň dykgatyna ýetirdi.