1-nji oýundaky hasaplar gaýtalandy Çempionlar ligasynda 1/8 finalyň jogap duşuşyklary oýnaldy. “Napoli” öz meýdançasynda “Real Madridi” kabul etdi. 1-nji ýarymda ýer eýeleri diýseň erjel oýun görkezdi. 24-nji minutda soňky wagtlaryň ezber hüjümçisi Draýs Mertens italýanlary öňe saýlady. Olara çärýek finala çykmak üçin ýene- de 1 gol ýeterlikdi. 1-nji oýunda 3–1 hasabynda ýeňiş gazanan “Real Madrid” 2-nji ýarymda başgaçarak oýun oýnady. Aýratynam, toparyň hemişeki halasgäri, klubuna telim gezek ýeňiş getiren esasy gollaryň awtory, kapitan Serjio Ramos ýene- de erjelligini görkezdi. Ol 52-nji minutda burçdan ýerine ýetirilen pökgini kellesi bilen urup, hasaby deňledi. 5 minutdan soň, Ramos ýene- de şoňa meňzeş pursatda kellesi bilen topy derwezä gönükdirdi. Onuň uran bu topy Mertense degip, tora girdi we “Real” 2–1 hasabynda öňe saýlandy. 90+1-nji minutda- da oýna soňradan goşulan Alwaro Morata tapawutlandy. Şunlukda, 1-nji oýnuň hasaby jogap duşuşygynda- da gaýtalandy we “Real Madrid” Çempionlar ligasynda (1992/93 möwsüminden bäri) bassyr 7-nji, umumylykda 15-nji ýola çärýek finala çykmagyň hötdesinden geldi. Ýene Kosielni we ýene- de 5–1 “Arsenal” Münhende 5–1 hasabynda utulyp, çärýek finala çykmak mümkinçiligini kyn ýagdaýa salypdy. Londondaky jogap duşuşygy aslynda “Arsenal” üçin şowly başlady. 20-nji minutda Teo Walkott owadan gol bilen toparyny öňe çykardy. Bu gol 1-nji ýarymdaky ýeke- täk gol boldy. 2-nji ýarymda welin, oýun başgaçarak boldy. 53- nji minutda gresiýaly emin “Arsenalyň” fransuz goragçysy Kosielnä gyzyl petek görkezdi we 11 metrlik jerime urgusyny belledi. Ýadyňyzda bolsa, 1-nji oýunda- da Kosielni şikes alyp, meýdançadan çykmaly bolupdy we şondan soň “Arsenal” 4 gol geçirdipdi. Bu saparam şeýle boldy. 55-nji minutda penaltini Lewandowski dürs ýerine ýetirdi. 68-nji minutda Robben, 78-nji minutda Duglas Kosta tapawutlandy. 80 we 85-nji minutlarda- da Arturo Widal 4–5-nji gollary öz adyna ýazdyrdy. Şunlukda, “Bawariýa” yzlyyzyna 6-njy, umumylykda 17-nji gezek çärýek finala çykdy. “Arsenal” welin, bassyr 7-nji möwsüminde 2-nji tapgyrdan soň, ýaryşdan çykyp, özboluşly antirekord goýdy. Mundan öňki antirekord 6 möwsümläp, çärýek finalyň bosagasyndan yzyna dolanan “Real Madride” degişlidi. “Barselonanyň” 300-nji ýeňşi 14-nji fewral – “Söýgüliler gününde” PSŽden 4–0 hasabynda utulan “Barselona” 8-nji mart Halkara zenanlar gününde taryhy ýeňiş gazandy. 1-nji oýundan soň, köpler “Barselona” üçin Çempionlar ligasynda möwsümiň tamamlanandygyny aýdypdylar. Sebäbi mundan öň, bu ýaryşda 4 gol aratapawudy bilen utulyp, 2-nji oýunda onuň öwezini dolan klub ýokdy. Ýöne muny başarsa, “Barselonanyň” başaryp biljekdigini- de belläpdiler. Ine-de, futbolyň taryhyndaky ýatdan çykmajak oýunda “Barselona” güýçli garşydaşyny 6–1 hasabynda ýeňip, mümkin däl başarnyk görkezdi. Duşuşykdan 1 gün öň, “Barçanyň” tälimçisi Luis Enrike: – Olar 4 gol geçiren bolsa, ertir bizem 6 pökgini tora salyp bileris – diýip, uly ynamynyň bardygyny metbugat ýygnagynda aýdypdy. Onuň diýşi ýaly- da boldy. Eýýäm 3-nji minutda Luis Suares hasaby açdy. 40-njy minutda Iniesta myhman toparyň goragçylaryny başagaýlyga saldy we Kurzawa ýalňyşlyk bilen topy öz torundan geçirdi. Ýer eýeleri 2-nji ýaryma- da gol bilen başlady. 50-nji minutda jedelli pursatdan soň, germaniýaly emin Deniz Aýtekin kömekçisiniň maslahaty bilen 11 metrlik jerime urgusyny belledi. Ony-da Messi dürs ýerine ýetirip, hasaby 3–0-a çykardy. Ýöne 62-nji minutda Kawani myhmanlaryň adyndan 1 gol geçirip, “barselonalylaryň” ýagdaýyny hasam kynlaşdyrdy. Emma ruhdan düşmedik katalonlar, esasanam Neýmar soňky minutlarda örän erjel oýun görkezdi. 85-nji minutda eminiň “Barselonanyň” derwezesiniň alkymynda Di Mariýanyň garşysyna ýol berlen gödeklik üçin penaltini bellemändigini ýatladalyň. 88-nji minutdan soň, futbol taryhynyň akymy üýtgedi. Şol pursatda braziliýaly Neýmar jerime urgusyndan diýseň owadan gol geçirip, toparyny has-da umytlandyrdy. 90+1-nji minutda ýene- de jedelli pursatda emin “Barçanyň” peýdasyna jerime meýdançanyň içindäki ak nokady görkezdi. Ony-da Neýmar dürs ýerine ýetirip, toparyna çärýek finalyň peteginiň bir ujuny görkezdi. Ýöne 5–1- lik hasabam katalonlara ýeterlik däldi. Hüjüm üstüne hüjüm edýän “Barselona” eminiň goşan 5 minuty tamamlanmanka, has takygy 90+4- nji minutyň 40-njy sekundynda 6-njy pökgini- de geçirmegi başardy. Ony oýna soňradan goşulan ýaş oýunçy Serji Roberto öz adyna ýazdyrdy. Şunlukda, bolmaz diýlen zat, boldy. 4–0-luk ýeňlişden soň, 6–1 hasabynda ýeňiş gazanan “Barselona” bassyr 10-njy, umumylykda 16-njy gezek çärýek finalyň petegini aldy. Bu görkeziji rekorda deňdir. “Barselona” Çempionlar ligasynda 4–0 hasabynda utulanyndan soň, ýeňiş gazanan ilkinji topar boldy. Katalonlar Ýewrokuboklarynda muny başaran 4-nji klub hökmünde bellige alyndy. 1961/62 möwsüminde Kubokçylaryň kubogy ýaryşynyň saýlama tapgyrynda Portugaliýanyň “Leişoes” topary Fransiýanyň “Şau-de-Fon” toparyndan 1-nji oýunda 6–2 hasabynda utulypdy. Jogap oýnunda 5–0 hasabynda ýeňiş gazanan “Leişoes” 4 golly aratapawutdan soň, indiki tapgyra çykan ilkinji klub bolupdy. 1984/85 möwsüminde- de UEFA Kubogynyň 2-nji tapgyrynda Belgradyň “Partizany” myhmançylykda “Kuins Park Reýnjersden” (Angliýa) 6–2 hasabynda asgyn gelipdi. Ýöne jogap duşuşygynda 4–0 hasabynda ýeňşini baýram edipdiler. 1985/86 möwsüminde- de UEFA Kubogynyň 3-nji tapgyrynda Germaniýada “Borussia M.” toparyndan 5–1 hasabynda utulan “Real Madrid”, Ispaniýada garşydaşyny 4–0 hasabynda ýeňipdi. Şeýle- de bu üstünlik “Barselonanyň” Ýewropaligalaryndaky 300-nji ýeňşi diýlip, hasaba alyndy. Bu oýunda 2 penalti goluny salan “Barselona” Ýewrokuboklarynda33- nji gezek 11 metrlik jerime urgularyndan gol geçirip, “Realyň” rekordyny täzeledi. Şol sanda “Barselona” öz meýdançasynda 10-njy sapar 5-den köp gol geçirdi. OBAMEÝANGDAN HET-TRIK Portugaliýada 1–0 hasabynda utulan Dortmundyň “Borussiasy” öz meýdançasynda “Benfikanyň” torundan jogapsyz 4 pökgi girizdi. Gollaryň 3-sini Pier- Emerik Obameýang, beýlekisini- de ýaş oýunçy Pulişiç öz adyna ýazdyrdy. “Borussia Dortmund” 6-njy sapar çärýek finalda çykyş eder. Çärýek finalyň bijeleri- de beýleki 4 klub belli bolanyndan soň, geljek hepdäniň anna güni, ýagny 17-nji martda belli bolar.
