UEFA Çempionlar ligasynyň täze möwsüminde-de soňky ýyllarda bolşy ýaly, 32 klub çykyş eder. Olaryň 22-si milli çempionatlarda gazanan netijeleri esasynda gönümel ýollanma alan bolsa, 10 klub 4 tapgyrly saýlama oýunlaryndan soň gatnaşmaga hukuk gazandy. 2 klub – Azerbaýjanyň “Garabag” hem-de Germaniýanyň “Leipsig” toparlary ilkinji gezek Çempionlar ligasynda çykyş ederler. Bu 2 topar Çempionlar ligasynyň final tapgyryna gatnaşmaga hukuk gazanan 136-njy we 137-nji klublardyr. “Garabagyň” final tapgyryna petek almagyndan soň, Azerbaýjan UEFA Çempionlar ligasynda kluby çykyş edýän 33-nji ýurt hökmünde hasaba alyndy. Kubogyň soňky 2 ýylynyň çempiony “Real Madrid” we onuň ezeli bäsdeşi “Barselona” hem-de Portugaliýanyň “Porto” kluby 22-nji gezek bu ýaryşda çykyş eder. Gollandiýanyň çempiony “Feýenoord” 15 ýyldan soň, 5-nji sapar Çempionlar ligasynda özüni görkezer.
“REAL MADRID” “H” TOPARÇADA
Hepdäniň penşenbe güni Monakoda täze möwsümiň toparçalarynyň bijeleri atyldy. Bijä laýyklykda, soňky çempion “Real Madrid” Germaniýanyň “Borussiýa D.” we Angliýanyň “Tottenham” ýaly güýçli klublary bilen “H” toparça düşdi. Olaryň beýleki garşydaşy welin, Kipriň APOEL toparydyr. “Real” bilen “Borussiýanyň” soňky ýyllarda telim gezek gabatlaşandygyny hem ýatladalyň. Ilkinji gezek gatnaşýan Azerbaýjanyň “Garabagy” “Çelsi”, “Atletiko” we “Roma” ýaly yklymyň ady belli klublary bilen bije atyşdy. Umuman toparçalarda futbol janköýerlerine “Benfika”–“Mançester Ýunaý- ted”, “Bawariýa”–PSŽ, “Çelsi”–“Atletiko”, “Roma”–“Çelsi”, “Ýuwentus”–“Barselona”, “Sewilýa”–“Liwerpul”, “Mançester Siti”–“Napoli”, “Porto”–“Monako”, “Real Madrid”–“Borussiýa Dortmund”, “Real Madrid”–“Tottenham” ýaly gyzykly duşuşyklar garaşýar. Bu duşuşyklaryň 2 gezek geçiriljekdiginden (hem myhmançylykda, hemem öz meýdançasynda) çen tutsak, onda futbol muşdaklarynyň ünsi eýýämden bu oýunlara jemlenip başlady diýsek, öte geçdigimiz bolmaz. Toparçadaky oýunlar 12-nji sentýabrda başlap, 6-njy dekabrda-da tamamlanar. Çempionlar ligasynyň 26, umumylykda 63-nji möwsüminiň finaly-da 2018-nji ýylyň 26-njy maýynda Ukrainanyň paýtagty Kiýewdäki Olimpiýa stadionynda oýnalar.
UEFA Çempionlar ligasy pleý-off tapgyrynyň jogap duşuşyklary: “Sewilýa”–“Istanbul BB”: 2–2 (2–1), “Nissa”–“Napoli”: 0–2 (0–2), “Riýeka”–“Olimpiakos”: 0–1 (1–2), “Astana”–“Seltik”: 4–3 (0–5), “Maribor” –“Hapoel B.Ş.”: 1–0 (1–2), “Kopengagen”–“Garabag”: 2–1 (0–1), APOEL–“Slawiýa”: 0–0 (0–2), SSKA–“Ýang Boýz”: 2–0 (1–0), “Liwerpul”–“Hoffenhaým”: 4–2 (2–1), “Stýaua”–“Sporting”: 1–5 (0–0).
