Dünýäniň iň gadymy kino festiwaly bolan Wenesiýa film şüweleňiniň 76-njysy tamamlandy. 10 günläp dowam eden festiwalda baş baýraga – “Altyn ýolbars” baýragyna “Joker” (Joker) filmi laýyk görüldi. Todd Fillipsiň režissýorlyk eden filminde baş keşbi meşhur aktýor Hoakin Finiks janlandyrýar. Şu ýylyň 4-nji oktýabryndan başlap, kinoteatrlarda görkeziljek filmde Hoakin Finiks ýene bir ýola özüniň ussat aktýordygyny subut edýär. Filmiň baş baýragy gazanmagynda onuň janlandyran keşbiniň şowly çykmagy bilen baglanyşyklydygyny bilermenler belleýärler.
Festiwalda eminleriň “Kümüş ýolbars” “Gran Pri” baýragyna polşaly režissýor Roman Polanskiniň “Ofiser we jansyz” (J’accuse) filmi mynasyp boldy. Argentinaly Lukresiýa Marteliň ýolbaşçylyk eden eminler toparynyň ýörite baýragy bolsa, “Olar indi öňküsi ýaly däl” (La mafia non e piu quella di una volta) filmi üçin italiýaly režissýor Pietro Marçellä gowşuryldy. Iň gowy režissýora berilýän “Kümüş ýolbars” baýragynyň bu ýyldaky eýesi şwesiýaly Roý Anderson boldy. Ol “Tükeniksizlik barada” (Om det oandliga) atly filmi üçin bu hormata laýyk görüldi.
Iň gowy aktýor diýlen ugurda “Volpi” kubogyna “Martin Idin” (Martin Eden) filminde baş keşbi janlandyran italiýaly Luka Marinelli gazandy. Iň gowy aktrisa diýlen ugurda “Volpi” kubogyna “Gloria Mundi” (Gloria Mundi) filmindäki keşbi üçin fransiýaly Arian Askarid mynasyp boldy. Gonkongly režissýor Ýonfanyň “7-nji belgi – Çerri Leýn” (No. 7 Cherry Lane) filmi iň gowy ssenariý baýragy bilen sylaglandy. Marçello Mastroianniniň adyny göterýän iň gowy ýaş artist baýragy bolsa, “Süýt diş” (Babyteeth) filminiň aktýory Robi Wollese gowşuryldy. “Geljegiň ýolbarsy” baýragy “Sen 20 ýaşyňda dünýäden gaýdarsyň” (You Will Die at 20) atly ilkinji režissýorlyk işi üçin sudanly Amjad Abu Alala berildi. Kino sungatyna goşan uly goşantlary üçin ispaniýaly režissýor Pedro Almodowar hem-de amerikaly aktrisa Juli Andrýuws “Ömürboýy başarnyk” baýragyna laýyk görüldi.
1932-nji ýyldan bäri geçirilip gelinýän Wenesiýa film festiwaly her ýyl Italiýanyň Wenesiýa şäherindäki Lido ýarymadasynda guralýar. Festiwalyň baş baýragyny mundan öňki 2 ýylda meksikaly režissýorlar Gillermo Del Toro bilen Alfonso Kuaron gazanypdy. Degişlilikde “Suwuň şekili” hem-de “Roma” filmleri bilen “Altyn ýolbarsy” gazanan režissýorlar Oskar baýraklarynda öňe saýlanypdy. “Suwuň şekili” iň gowy film, “Roma” bolsa iň gowy režissýor baýraklaryny eýeläpdi. Eýýämden kino sungatynyň iň abraýly baýragy ugrunda ady agzalýan “Joker” filminiň-de Oskaryň esasy dalaşgärleriniň biri bolmagyna garaşylýar.
