“Netflix”, “Hulu”, “Amazon” ýaly sanly media platformalarynyň üstünlik gazanmagyndan soň, bu pudaga baş goşýanlaryň sany artyp başlady. Dünýä belli tehnologiýa kompaniýasy “Apple” hem özüniň golaýda “Apple TV+” atly sanly media platformasynyň şu ýylyň 1-nji noýabryndan ýaýlyma başljakdygyny habar berdi. Iň pes aýlyk tölegi 4,99 dollar boljak “Apple TV+” platformasynda täze filmler, seriallar tomaşaçylaryň dykgatyna ýetiriler. Baha babatda beýlekilerden arzan boljak “Apple TV+” platformasynyň ýene bir esasy aýratynlygy “iPhone”, “iMac” ýa-da “Apple”-niň beýleki önümlerini satyn alanlaryň 1 ýyllap abunasy tölegsiz bolar. Ýeri gelende aýtsak, 12-nji noýabrda “Disney+” platformasy hem öz işine başlar.
Häzirlikçe 100-den gowrak ýurduň raýatlary “Apple TV+” platformasyndan peýdalanyp biler. Stiwen Spilberg, M. Naýt Şýamalan, J.J. Abrams, Damien Şazell, Ron Howard, Taika Waititi, Sofiýa Koppola ýaly belli režissýorlar bilen ozal şertnama baglaşan “Apple TV+” platformasynda Jennifer Eniston, Riz Wizerspun, Stiw Karrel dagynyň çykyş edýän “The Morning Show”, Stiwen Naýtyň režissýorlygynda, Jeýson Momoanyň baş keşpde surata düşýän “See” ylmy-fantastik serialy, Haili Steinfeldiň Emili Dikinsonyň keşbini janlandyrýan “Dickinson” serialy ilkinji günden başlap, ýaýlyma berler. Çagalar üçinem “Helpsters”, “Snoopy in Space”, “Ghostwriter” ýaly seriallar, şeýle-de “The Elephant Queen” atly köp bölümli dokumental film hem-de Opra Winfreýiň belli ýazyjylar bilen söhbetdeşlik gurajak telegepleşigi ýaly efirler muşdaklara ýetiriler. “Amazing Stories”, “Truth Be Told”, “Little America”, “Servant” hem-de “Little Voice” ýaly häzirden garaşylýan seriallar bolsa, soňky aýlarda “Apple TV+” platformasynda görkezilip başlar.
