2020-nji ýylyň 12-nji maýynda Türkmenistanyň Daşary işler
ministri R.Meredow Garaşsyz Döwletleriň Arkalaşygyna gatnaşyjy-
döwletleriň Daşary işler ministrleriniň geňeşiniň mejlisine gatnaşdy,
çäre göni wideoaragatnaşyk arkaly geçirildi.
Duşuşyga Arkalaşyga gatnaşyjy-döwletleriň daşary işler
ministrleri, GDA-nyň Ýerine ýetiriji komitetiniň başlygy – Ýerine
ýetiriji sekretary S.N.Lebedew dagylar gatnaşdylar.
Işjeň ara alyp maslahatlaşmalaryň barşynda taraplar ýurtlaryň
dünýädäki epidemiologiki ýagdaýlar bilen baglylykda Arkalaşygyň
çäklerindäki özarahereketlerine degişli bolan möhüm meseleleriň
birnäçesini ara alyp maslahatlaşdylar. Parahatçylygyň we howpsuzlygyň
üpjün edilmegi, häzirki zaman wehimlerine we howplaryna garşy göreş
alyp barmak, biologiki we ekologiki howpsuzlyk, şeýle-de özara
gyzyklanma döredýän hyzmatdaşlygyň beýleki derwaýys meseleleri
bilen bir hatarda sebit we halkara gün tertibiniň ähmiýetli ugurlary
boýunça pikirler alyşyldy.
Garaşsyz Döwletleriň Arkalaşygyna gatnaşyjy-döwletleriň
pandemiýanyň garşysyna göreş alyp barmak boýunça bilelikdäki
hereketleri ara alnyp maslahatlaşyldy. Şunuň bilen baglylykda
özarahereketleriň netijeli gurallarynyň ýola goýulmagynyň
derwaýyslygy bellenildi. Ministr R.Meredow ylmy diplomatiýa ugry
boýunça alym-lukmanlaryň, tejribe geçýän lukmanlaryň arasynda
gatnaşyklaryň ýola guýulmagynyň meselesine seredilmeginiň
maksadalaýyk bolup durýandygyny nygtady. Ol « ulgamlaýyn işlere
ýokary hünär derejesinde bu görnüşdäki çemeleşmäniň Türkmenistanyň
Prezidenti tarapyndan Goşulyşmazlyk Hereketiniň golaýda geçirilen
Sammitiniň barşynda öňe sürlendigini» belläp geçdi.
GDA ýurtlarynyň halkara guramalarynyň, aýratyn hem BMG-niň,
ÝHHG-niň, ÝB-niň we ŞHG-nyň çäklerindäki çemeleşmeleriniň we
ileri tutýan ugurlarynyň utgaşdyrylmagy bilen birlikde özarahereketleriň
şertnama-hukuk binýadyna jikme-jik seredilip geçildi. Bu ugurda
döwletara gatnaşyklarynda, aýratyn hem ýüze çykýan dawalaryň we
gapma-garşylyklaryň çözülmegi bilen birek-birege ynanyşmagyň hem-
de gatnaşyklaryň medeniýetiniň pugtalandyrylmagynyň derwaýyslygy
barada gürrüň edildi.
Taraplar şeýle-de ykdysadyýet, energetika, ylym we bilim
ulgamlarynda, şeýle-de ykdysadyýetiň ileri tutulýan pudaklaryna
innowasiýalaryň we öňdebaryjy tehnologiýalaryň işlenilip düzülmegi we
ornaşdyrylmagy babatynda hyzmatdaşlygyň giňeldilmeginiň
zerurlygyny aýratyn nygtadylar.
Mejlisiň jemleri boýunça birnäçe resminamalara, şol sanda
«Garaşsyz Döwletleriň Arkalaşygynyň çäklerinde 2019-njy ýyl üçin
daşary işler ministrlikleriniň köptapgyrly geňeşmeleriň Meýilnamasynyň
ýerine ýetirilşi hem-de 2020-njy ýyl üçin Meýilnamasy hakynda»,
«Garaşsyz Döwletleriň Arkalaşygyna gatnaşyjy döwletleriniň 2021-
2030-njy ýyllar üçin bedenterbiýe we sport babatynda
hyzmatdaşlygynyň ösüşiniň Strategiýasy hakynda», «Arkalaşygyň
medeni paýtagty» Döwletara maksatnamasynyň 2022-nji ýylda Gyrgyz
Respublikasynda (Karakol ş.) amala aşyryrylmagy hakynda” Çözgütlere
gol çekildi.
