Tehnologiýa ulgamynyň iň iri kompaniýalarynyň biri bolan “Microsoft Corp.” Şereketiniň 2015—2016-njy maliýe ýylyndaky sap girdejisi 16,798 milliard dollara deň boldy. Şu ýylyň iýun aýynyň 30-ynda maliýe ýyly tamamlandy. Kompaniýanyň bu görkezijisi geçen ýylyň degişli döwrüne garanyňda, 37,7 göterim köpdür. Bu barada şereketiň resmi internet saýty habar berýär.
Şereketiň maliýe ýylynyň dördünji çärýegindäki arassa girdejisi 3,122 milliard dollara golaýlady. Kompaniýanyň amala aşyrýan hyzmatlaryndan gelýän girdeji 5 göterim köpeldi. Degişli döwürde söwda satuwyndan gelen girdejisi 54 göterime deň boldy. Dürli kompýuter programmalaryny taýýarlaýan “Microsoft Corp.” şereketiniň hasabat döwründe hususy müşderilerine satan programmalarynyň möçberi 19 göterim artdy. Oňa agza bolan müşderileriň sany 23,1 milliona golaýlady.
Amerikanyň “Microsoft Corp.” kompaniýasy 1975-nji ýylda Bill Geýts hem-de Pol Allen tarapyndan esaslandyryldy. Onuň merkezi binasy Waşingtonyň Redmond etrabynda ýerleşýär. Ol kompýuter programmalaryny taýýarlaýar. “Microsoft Corp.” kompýuterleriň işlemegine mümkinçilik berýän “Windows” programmasynyň esaslandyryjysydyr.
