Serbiýanyň paýtagty Belgradda ýeňil atletika boýunça üsti ýapyk binalarda 34-nji Ýewropa çempionaty geçirildi. 3 günläp dowam eden çärä 48 ýurtdan 567 türgen gatnaşdy. Olar ýeňil atletikanyň umumylykda 26 ugry boýunça özara bäsleşdiler. Birnäçe milli rekordyň goýlan çempionatynda medallaryň sanawynda polşaly ýeňil atletikaçylar öňe saýlandylar. Olar 7 altyn, 1 kümüş, 4 bürünç, jemi 12 medal gazandylar. 2-nji orna 5 altyn, 4 kümüş, 1 bürünç medal alan Beýik Britaniýanyň türgenleri mynasyp boldy. 3-nji ýeri 2 altyn medal gazanan germaniýaly türgenler eýelediler (2 kümüş, 5 bürünç). Fransuzlaram 2 altyn medal alyp, germaniýaly ýeňil atletikaçylardan 1 kümüş az alany üçin 4-njilik bilen oňňut etmeli boldular. 26 döwletiň türgenleri medal alan bolsa, şolaryň 14-siniň wekili azyndan 1 altyn medal gazanmagy başardy. Erkekleriň arasyndaky ylgamak ýaryşlarynda 60 metrde britaniýaly Riçard Kilti, 400 metrde çehiýaly Pawel Maslak, 800 we 1500 metrde polşaly türgenler degişlilikde, Adam Ksisot bilen Marsin Lewandowski, 3000 metrde Adel Mehal, päsgelçilikli 60 metrde Beýik Britaniýadan Andrýuw Pozzi hem-de 4×100 metr estafetada polşaly ylgaýjylar altyn medala mynasyp boldular. Beýikligine we syrykly bökmekde polşaly türgenler Silwester Bednarek bilen Piotr Lisek, şol sanda, gülle zyňmakda- da polşaly Konrad Bukowieski, uzynlygyna bökmekde albaniýaly Izmir Smaýlaj, üçürdikläp bökmekde portugaliýaly Nelson Ewora dagy ýeňiş gazandylar. Heptatlonda (7 görnüşli) fransiýaly Kewin Maýer yklymyň rekordy bilen ýeňiji boldy. Zenanlaryň arasynda ylgaw bäsleşiklerinde 60 metrde Beýik Britaniýadan Aşa Filip, 400 metrde Fransiýadan Floria Guei, 800 metrde Şweýsariýadan Seline Buhel, 1500 we 3000 metr ylgawlaryň ikisinde- de Laura Muir (Beýik Britaniýa), päsgelçilikli 60 metrde germaniýaly Sindi Roleder hem-de 4×100 estafeta ylgawynda erkeklerde bolşy ýaly, polşaly ýeňil atletikaçylar münberiň çür depesine çykdylar. Beýikligine bökmekde Litwadan Airine Palşite, syrykly bökmekde germaniýaly Ýekaterini Stefanidi, uzynlygyna bökmekde ýer eýesi Serbiýadan Iwana Şpanowiç, üçürdikläp bökmekde Germaniýadan Kristin Gieriş, gülle zyňmakda Anita Marton hem-de pentatlonda (5 görnüşli) belgiýaly Nafissatu Tiam dagy tapawutlandylar. 1970-nji ýyldan bäri guralyp gelinýän ýaryşyň 35-njisi 2019-njy ýylda Şotlandiýanyň Glazgo şäherinde geçiriler. Ondan soňky çempionat welin, 2019-njy ýylda Germaniýanyň Karslrue şäherinde guralar.
