5-10-njy noýabr aralygynda Şanhaýyň milli sergi toplumynda ikinji halkara import sergisi (CIIE) geçirilýär. Sergide dünýäniň 150 ýurdundan 3 müňden gowrak kompaniýa 360 müň inedördül metr meýdanda öz önümlerini we hyzmatlaryny hödürleýär. Şunuň bilen bir wagtda 64 ýurt milli pawilýonlary bilen gatnaşýar. Sergi Bütindünýä söwda guramasynyň ýardamy bilen Hytaýyň söwda ministrligi we Şanhaýyň ýerli häkimiýeti tarapyndan guraldy. Sergide dürli ýurtlaryň söwda, senagat we maýa goýum mümkinçilikleri babatda soňky gazananlary hödürlenýär. Bu ýerde iri maýadarlar we söwda hyzmatdaşlary hytaý bazarynyň dürli ugurlar boýunça hödürleýän mümkinçilikleri bilen tanyş boldular. Bu ýyl Hytaýyň pawilýony ýurduň soňky ýyllarda gazanan sosial-ykdysady gazananlaryna bagyşlanypdyr.
Maglumatlara görä, Hytaý ýakyn bäş ýylda bahasy 10 trillion dollardan gowrak harytlary we hyzmatlary import eder. Şanhaýyň geçen ýylky birinji import sergisinde 57 milliard dollardan gowrak bahasy bolan şertnamalara gol çekildi.
4-6-njy noýabr aralygynda Hytaýda saparda bolan Fransiýanyň Prezidenti Emmanuel Makron HHR-iň Başlygy Si Szinpin bilen birlikde bu sergä gatnaşdy. Mundan başga-da, bu sergä Ýamaýkanyň Premýer-ministri Endrýu Holness, Gresiýanyň Premýer-ministri Kiriakos Misotakis we Serbiýanyň Premýer-ministri Ana Brnabiç gatnaşdylar.
6-njy noýabrda Si Szinpin fransuz liderini resmi gepleşikler üçin Pekinde kabul etdi. Emmanuel Makron bilen Si Szinpiniň Pekinde geçiren gepleşiklerinden soňra mälim edilen bilelikdäki beýanatda iki ýurduň Liderleriniň daşky gurşaw boýunça Pariž ylalaşygyna berk eýerýändikleri tassyklanýar. Duşuşygyň gün tertibinde ykdysady aragatnaşyklar hem-de ekologiýa meseleleri ara alnyp maslahatlaşyldy. Şeýle hem atom energetikasy, awiasiýa, aerokosmos senagaty ýaly pudaklarda hyzmatdaşlyk hakynda täze ylalaşyklar gazanyldy. Fransiýanyň Prezidentiniň saparynyň çäklerinde bahasy 15 milliard ýewro deň bolan birnäçe şertnama gol çekildi.
