Geçirilen soňky barlaglar smartfon satuwyndaky pese gaçyşlygyň az hem bolsa dowam edýändigini görkezdi. “Gartner” şereketiniň maglumatlaryna görä, 2019-njy ýylyň ikinji çärýeginde smartfon satuwy 1,7 göterim azalypdyr. Şereketiň barlaglar boýunça direktory Anşul Gupta ýokary hilli smartfonlara bolan islegiň orta we arzan bahaly telefonlara garanyňda has hem azalýandygyny belleýär. Bu döwürde global bazarda jemi 368 million telefon satylypdyr. Brendler hasaba alnanda, degişli döwürde “Samsung” 75 million telefon satypdyr. Täze telefon satyn alan her bäş adamyň biri (20,4%) “Samsung”-y saýlapdyr. Geçen ýylyň degişli döwründe bu görkeziji 19,3 göterim bolupdyr. “Huawei” kompaniýasynyň bazardaky paýy bolsa, 13,3 göterimden 15,8 göterime ýetipdir. Munda içki bazardaky ösüşiň täsiri uly bolupdyr. Kompaniýanyň öz watanyndaky ösüşi 31 göterim ýokarlanypdyr. Sanawda üçünji orny eýeleýän “Apple” şu ýylyň ikinji çärýeginde 38 million smartfon satypdyr. Şeýlelikde, onuň global bazardaky paýy 11,9 göterimden 10,5 göterime düşüpdir.
Hytaý we Braziliýa bolsa smartfon bazarynyň ösen döwletleri boldy. Dünýäniň iň köp ilatly ýurdy bolan Hytaýda 101 million smartfon satylypdyr. 5G smartfonlarynyň peýda bolmagy bilen Hytaýda satylýan telefonlaryň arasynda 4G modelleriniň köpüsiniň satuwy bes edilipdir. Degişli döwürde Braziliýada 10,8 million smartfon satylypdyr. Bilermenler bu görkezijiniň ýurduň ykdysady ösüşiniň hem alamatydygyny belleýärler. Üç aýyň dowamynda Hindistanda 35,7 million smartfon satylyp, bu global satuwyň 9,7 göterimini emele getirýär. “Gartner” şereketiniň bilermenleri şu ýylyň dowamynda bütin dünýäde satylan telefonlaryň sanynyň 1,5 milliard boljakdygyny çaklaýarlar. Bu görkeziji geçen ýyldakydan 2,5 göterim az bolar.
