Her ýylyň ahyrynda dürli ugurlarda ýylyň jemi jemlenýär hem-de edilen işlere baha berilýär. Neşirler bolsa, bular barada giňişleýin maglumat berýär. Dünýä belli neşirler şu ýylyň dowamynda oýlanyp tapylan iň gowy enjamlaryň sanawyny taýýarlapdyr. Bularyň köpüsini belli kompaniýalar öndürmänsoň, olar barada metbugat sahypalarynda hem o diýen köp maglumat berilmändir. Olaryň käbirleri baradaky maglumatlary size ýetirmegi makul bildik.
“Flyte” atly lampa elektromagnetizm häsiýeti arkaly howada durup hem-de aýlanyp bilýär. Simon Morris tarapyndan işlenip düzülen bu çyranyň bahasy 349 dollar.
“Solar Roof”: “Tesla” we “SolarCity” kompaniýalary tarapyndan işlenip düzüldi we adaty panellerden tapawutlylykda ol demir böleklerine meňzemeýär. Ony jaýyň üçegine ýerleşdireniňde has owadan görünýär. Onuň dürli reňkli we nagyşly görnüşleri bar.
“Morpher”: plastmassadan öndürilen welosiped kaskasyny tekizjek bolar ýaly edip epläp bolýar. 119 dollardan satuwa çykarylan kaskany Jef Wulf işläp düzüpdir.
“The Unusual Football Field”:“AP Thailand” şereketi tarapyndan oýlanyp tapylan futbol meýdançasy dar ýerlerde top oýnamaga niýetlenipdir. Ol gönüburçluk görnüşinde däl-de, “L” harpynyň şekilinde ýasalypdyr.
“Nike Hyperadapt 1.0”: aýakgap önümçiligi bilen meşgullanýan kompaniýanyň işläp düzen bu köwşüniň diline ýerleşdirilen düwmä basanyňda, onuň kemeri büzülip, injigi gysýar. Ýene-de düwmä basmak arkaly ony gowşadyp bolýar. Bu aýakgap 720 dollardan satuwa hödürlendi.
“Quip”: batareýa bilen işleýän diş çotgasy size dişiňiziň haýsy ýerini näçe wagtlap arassalamalydygyňyzy ýatladýar.
“PlayStationVR”: “Sony” kompaniýasynyň öndüren enjamy häzirki wagtda giňden ulanylýan “PlayStation 4” oýun konsoly bilen sazlaşykly işläp bilýär. 400 dollarlyk äýnek kompýuter oýunlaryny hakykata has golaýlaşdyrýar.
“Chevrolet Bolt”: “General Motors” kompaniýasy bir gezekki zarýady bilen 300 km-den hem köp ýol geçip bilýän ulagy işläp taýýarlady. Bahasy 40 müň dollar.
“HelloSense” atly jaň sagady otagyň ýagtylygyny, ýylylygyny, kislorod mukdaryny ölçeýär we rahat uklamaga kömek edýär. Bahasy 149 dollar.
“Kid Power Band”: häzirki wagtda dünýäniň ähli ýerinde diýen ýaly ene-atalar çagalarynyň kompýuter oýunlaryna has köp üns berýändiklerinden, açyk howada sport ýa-da oýun bilen meşgullanmaýandyklaryndan zeýrenýärler. ÝUNISEF tarapyndan işlenip düzülen bilezik çagalary sport bilen has köp meşgullanmaga höweslendirýär.
“Dyson Supersonic”: adaty saç guradyjy enjamlara garanyňda, has sessiz we çalt işleýän “Dyson Supersonic” sensorlary arkaly saçyňy emaý bilen guradýar.
“Wynd”: ululygy çüýşäniňkä barabar bolan enjam otagyňyzdaky howany arassalaýar. Bahasy 154 dollar.
“Mattel Barbie” atly gurjak hakyky gyza meňzeşligi bilen köp ýyllardan bäri gyzlaryň uzyn we inçe bolmalydygy baradaky düşünjäni aradan aýyrýar. Bahasy 10 dollar.
“The Orange-Fleshed Sweet Potato”: “HarvestPlus” we CIP kompaniýalarynyň biologlary Afrika ýurtlarynda Awitaminine baý süýji kartoşka öndürmeklerine goldaw berýärler.
