“Microsoft” kompaniýasynyň ozalky başlygy we esaslandyryjysy Bill Geýts dünýäniň iň baý adamlarynyň biridir. Şeýle derejäni belli bir döwürde “Amazon”-yň baş direktory Jeff Bezos eýelese-de Geýts birinji orny tiz yzyna gaýtarmagyň hötdesinden geldi. Mundan başga-da “Microsoft”-yň esaslandyryjysy haýyr-sahawat üçin juda köp pul sarp edýär. Bill Geýts 1999-njy ýylda “Microsoft”-yň paýnamasyndan 16 milliard dollary haýyr-sahawat işlerine berip, ýene-de bir ýyldan soň, 5,1 milliard dollary haýyr-yhsan işlerine geçirýär. Bu Bill Geýtsiň amala aşyran iň uly haýyr-sahawat işleriniň biridir. “Bloomberg” saýtynyň ýazmagyna görä, şu ýylyň iýun aýynda 61 ýaşly milliarder 4,6 milliard dollar möçberindäki puly haýyr-sahawat işlerine bagyşlap, bu onuň soňky 17 ýylyň içinde amal eden iň uly haýyr işidir. Hatda soňky haýyr-sahawat işinden soň, 86,1 milliard dollara eýe bolan Bill Geýts dünýäniň iň baý adamy bolmagynda galýar. Bill 1995-nji ýyldan bäri aýaly Melinda bilen jemi 35 milliard dollary haýyr-sahawat işlerine bagyşlady.
Bill Geýts dünýäde jomart haýyr-sahawatçylaryň biri bolup durýar. Onuň 2000-nji ýylda esaslandyran “Bill we Melinda Geýtsiň gaznasy” dünýäde iň iri haýyr-sahawat gaznalarynyň biridir. Onuň maksady saglygy goraýyş ulgamyny innowasiýa enjamlary bilen üpjün etmek we ony dünýä jemgyýetçiligine öwretmekden ybaratdyr. Bill Geýts söýgüli aýaly we üç çagasy bilen Waşington kölünden uzakda bolmadyk ýerde ýaşaýar. Geýts okamak, golf we brij oýunlary bilen gyzyklanýar.
Bill Geýtsiň ganatly sözleri:
Men müşgil işe hemişe ýaltalary çekýärin, çünki olar işi berjaý etmegiň iň aňsat tärini bilýärler.
Haçan-da, kelläňize gowy pikir gelen bolsa, bada-bat işe girişiň.
Berjaý edýän işiňizden lezzet alsaňyz, ömrüňizde hiç haçan işlemedik ýaly bolarsyňyz.
Eger-de sende internet bolmasa, onda sende biznes hem bolmaz.
Taýýarlan Aýtana Ýazmedowa,
Halkara nebit we gaz uniwersitetiniň talyby.
