Haýwanat dünýäsinde haýran galdyrýan rekordlar örän köp. Ginnesiň rekordlar kitabynyň ýörite neşirinde (Guinness World Records: Wild Things) bular barada jikme-jik gürrüň berilýär. Çagalara we ýetginjeklere niýetlenen bu kitapda, guşlar, mör-möjekler, deňizde hem-de gury ýerde ýaşaýan jandarlaryň iň ululary we kiçileri barada gyzykly maglumatlar bar. Geliň, olaryň käbiri bilen tanyş bolalyň!
Ak akula: iň uly ýyrtyjy balyk hasaplanyp, olaryň uzynlygy ortaça 4,6 metre barabar bolýar. Kähalatlarda olar 6 metre çenli ulalýar.
Kapibara: Günorta we Orta Amerikada ýaşaýan bu jandarlar iň uly gemriji hasaplanýar. Olaryň uzynlygy 130 santimetr, boýy 50 santimetr töweregi bolýar.
Gök kit: suwda ýaşaýan bu süýdemdirijiniň uzynlygy 30 metrden geçýär. Agramy 200 tonna golaýlaýar.
Afrika pili: gury ýerde ýaşaýan iň uly jandar hasaplanýar. Boýy egnine çenli 4 metre ýetýär. Agramy 10 tonna barabar.
Ýaşyl anakonda: iň uly ýylanyň uzynlygy 8,8 metre ýetýär. Agramy 220 kilograma çenli bolýar.
Torly piton: dünýäniň iň uzyn ýylany bolup, agramy 158 kilograma barabar. Onuň uzynlygy 10 metrden geçýär.
Guş iýýän möý: Dünýäniň iň uly möýi hasaplanýar. Zäheri bolmadyk tüýli jandaryň agramy 175 gram, ululygy 28 santimetre barabar. Gara we açyk goňur reňkli bolýan bu möýler Günorta Amerikada we şol ýerlerdäki adalarda ýaşaýar.
Žiraf: agramy 1200 kilograma ýetýän bu jandarlaryň boýy 6 metrden geçýär. Iň uzyn boýly jandaryň boýunyň üçden bir bölegini onuň boýny emele getirýär.
Ary kolibri: adyndan hem belli bolşy ýaly, bu kiçijik guşlaryň boýy 5,7 santimetr töweregi. Olar açyk reňkli gülleriň şireleri bilen iýmitlenýär. Kubada ýaşaýan bu guşjagaz örän çalasynlyk bilen uçýar. Olaryň agramy 1,95-2,6 gram töweregi bolýar.
