Her ýylda geçirilýän “Iň gowy bugdaý” bäsleşiginde ýene-de şol bir daýhan ýeňiji bolupdyr. Daýhandan beýle gowy hasyl almagyň syryny sorapdyrlar. Daýhan:
– Munuň syry özümdäki gowy bugdaý tohumyny goňşularym bilen paýlaşmakda – diýipdir. Muňa haýran galan adamlar:
– Öz bugdaý tohumyňyzy her ýaryşda siziň bäsdeşiňiz boljak goňşularyňyza berýäňizmi? – diýip sorapdyrlar. Daýhan:
– Elbetde – diýip jogap beripdir. Bu sözleri diňläp duran mähelläniň bilesigelijiligi has hem artypdyr. Olar daýhanyň ýüzüne soragly nazarlaryny dikipdirler. Daýhan:
– Siziň bilmeýän bir zadyňyz bar. Bugdaý maýsalary şemala ygşyldaşyp, bir-birleri bilen tozanlanýarlar. Şemal goňşy atyzdaky bugdaýlaryň tozgalaryny meniň ekin meýdanyma alyp gelýär. Ekinden gowy hasyl almak üçin olaryň gowy ekin bilen tozanlanmagy gerek. Goňşymyň ekini ýaramaz bolsa, men hem gowy hasyl alyp bilmerin. Şol sebäpli goňşularymyň gowy hasyl almagyna men hem kömek edýärin – diýipdir.
Ýagşynyň ýagşa ýeter hümmeti,
ýamanyň ýagşa ýeter minneti.
