Germaniýanyň “Volkswagen” kompaniýasy ulagy kärendesine berýän hyzmaty ýola goýdy. Berlinde durmuşa geçirilen “WeShare” (“Biz paýlaşýarys”) atly taslamanyň çäklerinde, ilkinji nobatda, dolulygyna elektrik energiýasy bilen işleýän 1500 “e-Golf” kysymly ulag hyzmata hödürlendi. Geljek ýyl olaryň arasyna “e-up!” we “ID.3” modelleri hem goşular. “WeShare” programmasy haýsydyr bir duralga zerurlyk bolman, mobil applikasiýa arkaly ulanylýan “erkin dolanyşyk” (“free-floating”) ulgamy hasaplanýar. “WeShare”, ilkinji nobatda, şäher merkezinde we otly duralgalarynyň golaýynda jemi 150 inedördül kilometr meýdany öz içine alar. Soňlugy bilen ulaglaryň sany köpeldiler we çägi giňeldiler. Howa menzillerine barlanda olardan aýratyn töleg alynmaz. Ulagyň bir sagatlyk tölegi häzirki wagtda 19 sente barabar bolup, sentýabrdan başlap üç görnüşli nyrhnama giriziler. Ulagy kärendesine almak üçin müşderiniň smartfonynyň, bank kartynyň we 21 ýaşyndan uly bolmagy bilen birlikde azyndan bir ýyllyk sürüjilik tejribesi talap edilýär. Şeýle hem “Lidl” we “Kaufland” ýaly azyk önümlerini paýlaýan şereketleriň şahamçalaryndaky zarýad beketlerinden peýdalanyp bilerler. Ýeri gelende aýtsak, “Volkswagen” golaýda elektrokarlaryň zarýad toruny ýaýbaňlandyrmak üçin “Schwarz Group” şereketi bilen hyzmatdaşlygy ýola goýupdy. Germaniýada kärendesine ulag sürýänleriň sany 2010-njy ýyldan bäri 14 esse köpelipdir. 2010-njy ýylda kärendesine ulag hyzmatyndan peýdalanýanlaryň sany 180 müň töweregi bolan bolsa, şu ýylyň başynda bu görkeziji 2,46 milliona ýetipdir.
