“Jaguar Land Rover” kompaniýasy gatnaw pudagyny düýpgöter täzelejek ulagyny tanyşdyrdy. Iňlis kompaniýasy munuň üçin özbaşdak hereket edýän elektrokarlary işläp taýýarlaýar. “Project Vector” atly ulag şäher içinde ýolagçy gatnawyny amala aşyrmaga niýetlenen. Ýolagçylaryň daş-töweregi synlamaklary üçin oňa giň penjireler oturdylypdyr. Kompaniýa indiki ýyldan başlap, synag maksatly gatnawlary ýola goýmagy göz öňünde tutýar. Uzynlygy 4 metre barabar bolan ulagyň içini ýolagçy islegine görä üýtgedip bilýär. Mysal üçin, ýanynda ulurak ýüki bar bolsa, ony ýerleşdirmek üçin boş duran oturgyjy galdyryp ýa-da süýşürip bilýär. Bu ulag Angliýanyň Milli awtoulag innowasiýa merkezinde işlenip taýýarlanypdyr.
Bilermenler hyýaly filmlerde görüp bolýan sürüjisiz ulaglaryň ýol hereketine goşulmagynyň uzakda däldigini belleýärler. Bu ugurda “Google” kompaniýasynyň “Waymo” ulagy bilen häzire çenli uly işler bitirildi. Iri awtoulag öndürijiler sürüjisiz ulaglar bilen bir hatarda uçýan taksileri hem işläp taýýarlamaga aýratyn ähmiýet berýärler.
