Ak bugdaýyň Watany hasaplanýan Türkmenistanda ýene-de bir zähmet ýeňşi gazanyldy. Döwletimiziň döredip berýän ähli mümkinçiliklerinden ýerlikli peýdalanýan türkmen gallaçylary Watan harmanyna 1 million 400 müň tonna bugdaý hasylyny tabşyryp, borçnamalaýyn meýilnamasyny artygy bilen ýerine ýetirdiler. Oba zähmetkeşleriniň bu ýeten zähmet ýeňşiniň hormatly Prezidentimiziň pygamber ýaş toýuna gabat gelmeginiň özi hem türkmen halkynyň şatlygyny goşalandyrdy.
«Türkmenistan – Bitaraplygyň mekany» ýylynda zähmetkeş babadaýhanlarymyz uly üstünlikleri gazanýarlar. Hormatly Prezidentimiz tarapyndan oba hojalyk işgärleriniň zähmet öndürijiligini hem-de hünär derejelerini artdyrmak, olaryň zähmet şertlerini gowulandyrmak meselelerine uly üns berilýär. Dünýä belli kompaniýalar bilen ýörite şertnamalar baglaşylyp, oba hojalyk tehnikalary yzygiderli satyn alynýar. Täze tehnologiýalaryň ornaşdyrylmagy önümçiligiň ösüş depginleriniň has-da ýokary derejelere ýetirilmegine, oba hojalyk önümleriniň eksport mümkinçilikleriniň artdyrylmagyna we netijede ýurdumyzda maýa goýum, innowasiýa işleriniň has-da ilerlemegine getirýär. Ylmyň, tehnologiýanyň soňky gazananlarynyň oba zähmetkeşleriniň durmuşyna berk ornaşmagy netijesinde, ýylyň-ýylyna türkmen topragynyň hasyllylygy artdyrylýar. Müňlerçe kämil tehnikalaryň ýetişdirilen hasylyň wagtynda ýygnalmagynda we döwlet harmanyna tabşyrylmagynda aýratyn orny bar.
Berkarar döwletimiziň bagtyýarlyk döwründe Gahryman Arkadagymyzyň parasatly baştutanlygynda oba hojalygyny ösdürmek boýunça uly işler durmuşa geçirilýär. Daýhanlara öndürijilikli işlemäge, toprakdan bol hasyl almaga, bolelin durmuşda ýaşamaga döwletimiz tarapyndan ähli mümkinçilikler döredilýär. Ýetişdirilen bugdaý hasylyny wagtynda ýygnap almak üçin hormatly Prezidentimiziň alyp berýän kuwwatly tehnikalary gije-gündiziň dowamynda iş çalşygynda bökdençsiz işledilýär.
Şu ýylky galla möwsüminde hormatly Prezidentimiz ähli welaýatlarda bolup, gallaçy babadaýhanlarymyzyň armasyny ýetirdi. Milli Liderimiziň Şa gadamyndan ruhlanan ýurdumyzyň gallaçylary bugdaýyň bol hasylyny ýetişdirdiler.
Şu ýyl ýurdumyzyň gallaçylary 690 müň gektar meýdandan 1 million 400 müň tonna bugdaý hasylyny ýetişdirdiler. Ahal welaýatynda 400 müň tonna, Mary welaýatynda 345 müň tonna, Lebap welaýatynda 310 müň tonna, Daşoguz welaýatynda 265 müň tonna we Balkan welaýatynda 80 müň tonna bugdaý ýygnaldy. Şu ýyl galla meýdanlarynda bugdaýyň «Sähraýy», «Juwan», «Bitarap», «Ýolöten-1», «Ýolöten-3», «Türkmenbaşy-1», «Gyzylşaglawuk-25», «Mi-ras», «Akbaş», «Ýubileýnaýa-100», «Batko» we «Wassa» ýaly ýokary hasylly görnüşleri ekildi.
Ýurdumyzda gazanylan bu zähmet üstünliginde gallaçy kärendeçiler bilen bir hatarda ähli oba ilatynyň hem mynasyp goşantlarynyň barlygy guwandyryjydyr. Halkymyzyň abadançylygyna gönükdirilen ykdysady özgertmelerinde obasenagat toplumyna möhüm ähmiýet berýän hormatly Prezidentimiziň özleri baradaky aladalaryna mynasyp zähmet görkezijileri arkaly jogap bermegi baş maksatlaryna öwren babadaýhanlar tarapyndan ak bugdaýyň bol hasyly ýetişdirildi. Häzirki döwürde Gahryman Arkadagymyzyň tagallasy bilen, ak bugdaýyň Watany bolan keramatly türkmen topragynda gallaçylygy ösdürmek boýunça toplumlaýyn işler giň gerimde alnyp barylýar. Oba hojalyk pudagyny ykdysadyýetimiziň kuwwatly pudagyna öwürmek, bu pudagyň işlerinde ylmyň täze gazananlaryny peýdalanmak we ökde hünärmenleri taýýarlamak ugrunda döwletimiz tarapyndan giň goldaw berilýär.
Un öndürýän döwrebap elewatorly kärhanalaryň, galla önümleri kärhanalarynyň, çörek we çörek önümleri boýunça önümçilik toplumlaryň artmagy azyk senagatynyň hem hemişe ösüşdedigini görkezýär.
Güljemal BERDINAZAROWA,
S. A. Nyýazow adyndaky Türkmen oba hojalyk uniwersitetiniň mugallymy.
