Türkmenistanyň mukaddes Garaşsyzlygynyň şanly 25 ýyllygy mynasybetli at çapyşygy dabarasy geçirildi. Paýtagtymyz Aşgabadyň golaýyndaky Köpetdagyň etegindäki Halkara atçylyk sport toplumynda geçirilen dabara hormatly Prezidentimiz hem gatnaşdy.
Ýurdumyzyň baş baýramynyň şanyna tutulýan toý dabaralara daşary ýurtdan köp sanly myhmanlar geldi. Olar ýurdumyzda Gahryman Arkadagymyzyň saýasynda bellenilýän baýramçylyk dabaralarynyň hormatly myhmany boldy. Halkara atçylyk sport toplumyndaky dabarada ýurdumyzyň halk hojalygynyň ähli ugurlarynda amala aşyrylýan giň gerimli özgertmeleri beýan edýän sergi ýerleşdirilipdir. Beýleki bir tarapda bolsa ýurdumyzyň ähli welaýatlaryndan gelen sungat ussatlary milli medeniýetimizi açyp görkezýän sergi ýaýbaňlandyrypdyrlar.
Garaşsyzlyk baýramynyň şanyna tutulýan toý dabaralaryň çäklerinde geçirilýän at çapyşyklary gyzykly geçdi. Dabaranyň çäklerinde 7 çapyşyk geçirildi. Şol çapyşyklaryň netijesi boýunça baýrakly orunlara eýe bolan çapyksuwarlara hormatly Prezidentimiziň adyndan ýeňil awtoulagyň açary dabaraly ýagdaýda gowşuryldy.
