Film dünýäsiniň iň abraýly sylagy bolan Oskar baýraklarynyň 90-njy gezekki gowşurylyş dabarasy geljek ýylyň 4-nji martynda geçiriler. Oskaryň arzyly baýraklarynyň biri bolan daşary ýurt dilindäki iň gowy film sylagynyň ilkinji dalaşgärleriniň sanawy mälim edildi. 84 ýurduň hersinden bir kino dalaşgär görkezilip, olaryň arasyndan Laos we Mozambik döwletleriniň filmleri ilkinji sapar sanawa alyndy. Ýylyň ahyrynda şol 84 filmiň arasyndan 9-sy final tapgyryna saýlanar. Olardanam 5-si ýanwar aýynyň ahyrlarynda Oskaryň beýleki dalaşgärleri bilen mälim ediler. Dalaşgär görkezilenleriň arasynda dünýä belli aktrisa Anjelina Joliniň režissýorlyk eden soňky filmi “Olar ilki meniň kakamy öldürdiler” (First They Killed My Father) hem bar. Film geçen asyryň 70–80-nji ýyllarynda Kambojada bolup geçen wakalar barada gürrüň berýär. Bu ekran eseri Kamboja döwletiniň adyndan wekilçilik eder. Şeýle-de Oskaryň eýesi, awstriýaly režissýor Maýkl Hanekeniň “Soňy haýyrly” (Happy End), germaniýaly Fatih Akynyň “Solgun” (In the Fade), russiýaly Andreý Zwýaginsewiň birnäçe baýrakly kinosy “Söýgüsiz” (Loveless), polşaly Agnieşka Hollandyň “Ýabany haýwanyň yzy” (Pokot) ýaly filmler bar.
