Şu ýylyň 29-njy awgusty – 8-nji sentýabry aralygynda geçiriljek 75-nji Wenesiýa film festiwalynda baş baýragyň — “Altyn ýolbars” baýragynyň dalaşgärleri mälim edildi. Kino dünýäsiniň iň uly 3 festiwalynyň biri bolan Wenesiýa film şüweleňi oskarly režissýor Damien Şazelliň täze kinosy “Ilkinji adam” (First Man) atly ekran eseri bilen açylar. Baş keşplerde Raýan Gosling, Kleýr Foý, Jeýson Klark, Kaýl Çandler ýaly artistleriň surata düşen kinosynda meşhur kosmonawt Neil Armstrongyň we ýoldaşlarynyň Aýa gezelenji barada gürrüň berilýär. Bu filmden başga-da festiwalda 20 kino baş baýrak ugrundan dalaşgärlige hödürlendi. Olaryň arasynda oskarly režissýor Alfonso Kuaronyň “Roma”, Maýk Leiniň “Peterloo”, wengriýaly Laslo Nemesiň “Sunset”, gresiýaly Ýorgos Lantimosyň “The Favourite”, doganlar Joel we Itan Koenleriň “The Ballad of Buster Scruggs”, amerikaly ussat režissýor Pol Gringrassyň “22 July”, fransiýaly Žak Odiaryň “The Sisters Brothers”, italiýaly Luka Guadagninonyň “Suspiria”, fransiýaly Oliwier Assaýasyň “Doubles Vies” filmleri baş baýragyň esasy dalaşgärleri hasaplanýar.
Bäsleşigiň daşyndan görkeziljek kinolaryň hatarynda-da aktýor Bredli Kuperiň surata düşüren we baş keşbinde özi bilen tanymal aýdymçy Leýdi Gaganyň çykyş eden “Ýyldyz dogýar” (A Star Is Born), hytaýly meşhur režissýor Çžan Imounyň “Kölege” (Ying) filmleriniň bardygyny hem belläliň.
Dünýäniň iň gadymy kino festiwaly bolan Wenesiýa film şüweleňinde eminlere Golliwudyň meksikaly režissýory, Oskar baýragynyň eýesi Gillermo Del Toro baştutanlyk eder. Eminler toparyny-da taýwanly aktrisa Silwia Çang, daniýaly aktrisa Trine Dirholm, fransuz aktrisasy Nikol Garsiýa, italiýaly režissýor Paolo Jenowese, polşaly režissýor Malgorzata Sumowska, Täze zelandiýaly režissýor Taika Waititi, awstiýaly aktýor Kristof Wolts, iňlis aktrisasy Naomi Wotts dagy düzýär.
