Beýik britaniýaly aýdymçy Ed Şiran konsert turlary boýunça dünýä rekordyny goýdy. 28 ýaşyndaky aýdymçy “Divide” atly konsert turlaryndan gazanan girdejisi (736,7 million dollar) hem-de satylan biletler (8,150 million adam) boýunça irland rok topary U2-niň rekordyny täzelemegi başardy. Ed Şiranyň bu konsert tury 2017-nji ýylyň mart aýynda başlapdy. Ol şu aýyň ahyrynda-da Angliýanyň Ipswiç şäherinde jemlener. Şunlukda, Ed Şiranyň bu konsert turunyň dowamlylygy 893 güne deň bolar. Aýdymçynyň şol döwürde beren konsertleriniň sany 255-e ýeter. Ýeri gelende aýtsak, U2-niň “360” atly konsert tury 760 günläp dowam edipdi. Şonda topar öz muşdaklaryna 100 konsert beripdi.
Baş keşbinde Tom Hardiniň surata düşen “Wenom” (Venom) filminiň ikinjisine kimiň režissýorlyk etjekdigi belli boldy. 2020-nji ýylyň aýagyna ekranlara çykaryljak “Wenom 2” filmine ussat aktýor Endi Serkis režissýorlyk eder. “Sony” şereketiniň hemaýatkärligindäki filmde ýene-de baş keşbi Tom Hardi janlandyrar. “Ýüzükleriň hökümdary” (The Lord of the Rings) filmindäki Gollumyň, “Maýmynlar planetasyndaky” (Planet of Apes) Sezaryň keşpleri bilen adygan Serkis mundan öň “Maugli: jeňňeliň rowaýaty” (Mowgli: Legend of the Jungle) hem-de “Dem” (Breathe) filmlerine režissýorlyk edipdi. Filmiň surata alnyş işlerine güýzde badalga berler.
Golliwudyň gawaili aktýory Jeýson Momoa “Netflix” kompaniýasynyň “Şirin gyz” (Sweet Girl) atly täze kinosynda baş keşbi ýerine ýetirer. Braýan Andýruw Mendozanyň režissýorlyk etjek filminiň ssenarisini Filip Eýsner bilen Gregg Hurwitz bilelikde ýazar. Filmiň beýleki artistleri we ýaýlyma goýberiliş wagty entek belli däl. Momoa häzirki wagtda “Netflix”-iň meşhur seriallaryndan “Frontier”-de hem baş keşbi ýerine ýetirýär. “Tagt oýunlary” (Game of Thrones)serialyndaky Khal Drogonyň keşbi bilen meşhurlyk gazanan aktýor “Akwamen” (Aquaman) filminde-de super gahrymanyň keşbini döredipdi.
